زرعی شعبہ کیلئے 24 گھنٹے بجلی کی ضرورت نہیں:ریونت ریڈی کا بیان، بی آرایس کا احتجاج

حیدرآباد: زرعی شعبہ کیلئے 24 گھنٹے بجلی سپلائی کرنے کی ضرورت نہ ہونے سے متعلق تلنگانہ پردیش کانگریس کمیٹی کے صدرریونت ریڈی کے ریمارکس پر شدید برہمی کااظہارکرتے ہوئے ریاست کی حکمران جماعت بی آرایس نے منگل اور بدھ کو ریاست بھر میں کانگریس کی مخالف کسان پالیسیوں کے خلاف احتجاج کافیصلہ کیا ہے۔

ریڈی نے امریکہ میں تلنگانہ کے این آرآئیز سے تبادلہ خیال کرتے ہوئے دعوی کیا تھا کہ زرعی شعبہ کیلئے 24 گھنٹے مفت بجلی کی سپلائی کی کوئی ضرورت نہیں ہے کیونکہ ریاست کے کسانوں کی اکثریت چھوٹے اور اوسط کسانوں کی ہے جن کے پاس تین ایکرسے کم اراضی ہے اور تین ایکڑ پر کاشتکاری کے لئے صرف تین گھنٹے بجلی کی سپلائی کافی ہے۔

انہوں نے الزام لگایا تھا کہ بی آرایس حکومت بجلی کی کمپنیوں سے کمیشن حاصل کرنے کیلئے ہی کسانوں کو 24 گھنٹے بجلی کی سپلائی کررہی ہے۔

وزیراعلی کے چندرشیکھرراو کسانوں کو گمراہ کررہے ہیں۔

کانگریس کی مخالف کسان پالیسیوں پر اس کو تنقید کا نشانہ بناتے ہوئے بی آرایس کے کارگذارصدرو وزیرآئی ٹی تارک راما راو نے پارٹی کیڈر کو ہدایت دی کہ وہ تمام مواضعات میں کانگریس کا پتلانذرآتش کرے۔

اپنے بیان میں انہوں نے کہاکہ کانگریس کسانوں کے مفادات اور کسان طبقہ کو 24 گھنٹے بجلی کی سپلائی کی پالیسی کے خلاف ہے۔