انجن میں آگ لگنے کی وارننگ کے بعد ایئر انڈیا کی پرواز دہلی واپس لوٹی

نئی دہلی: دہلی سے اندور جا رہی ایئر انڈیا کی ایک پرواز کو اتوار کی صبح ٹیک آف کے فورا بعد انجن میں آگ لگنے کی وارننگ کی وجہ سے دہلی واپس آنا پڑا ۔

ذرائع نے بتایا کہ طیارے میں 90 سے زائد مسافر سوار تھے ۔

دہلی کے اندرا گاندھی بین الاقوامی ہوائی اڈے سے پرواز اے آئی 2913 کے اڑان بھرنے کے فوراً بعد ، پائلٹ کو طیارے کے دائیں انجن میں آگ لگنے کی وارننگ ملی ۔ احتیاطی اقدام کے طور پر انجن کو بند کر دیا گیا اور طیارے کو ایک ہی انجن پر دہلی واپس لایا گیا ۔

ہوائی اڈے کے حکام نے بتایا کہ صبح چھ بجکر پندرہ منٹ پر ہوائی اڈے پر مکمل ایمرجنسی کا اعلان کیا گیا ۔

اس واقعے پر افسوس کا اظہار کرتے ہوئے ایئر انڈیا نے ایک بیان میں کہا کہ طیارے کو معائنے کے لیے حوالے کر دیا گیا ہے اور مسافروں کو دوسرے طیارے کے ذریعے اندور لے جانے کے انتظامات کیے جا رہے ہیں ۔ اس معاملے کی اطلاع شہری ہوابازی کو منضبط کرنےوالے ادارے ڈی جی سی اے کو بھی دی گئی ہے ۔