آئین کو بچانے کیلئے سب کو متحد ہونے کی ضرورت: نتیش کمار

نئی دہلی: بہار کے چیف منسٹر نتیش کمار نے کہا کہ آئین کو بچانے کے لئے پورے ملک میں تمام کو متحد ہونے کی ضرورت ہے۔ چیف منسٹر اروند کیجریوال سے ملاقات کے بعد اتوار کو نامہ نگاروں سے بات چیت کرتے ہوئے کمار نے کہا کہ سپریم کورٹ کے فیصلے کے بعد مرکزی حکومت جو کچھ کرنے کی کوشش کر رہی ہے وہ عجیب ہے۔

 حکومت کو دیا گیا اختیار کیسے چھینا جا سکتا ہے۔انہوں نے کہا کہ سب کو متحد ہونا چاہیے تاکہ ان لوگوں کو روکا جائے جو اپنے طریقے سے آئین سے کھلواڑ کر رہے ہیں۔

اروند کیجریوال کی تعریف کرتے ہوئے انہوں نے کہا کہ وہ اچھا کام کر رہے ہیں اور ایسی صورت حال میں ہم انہیں اس معاملے پر اپنی حمایت دے رہے ہیں۔

کمار نے کہا کہ ہم زیادہ سے زیادہ اپوزیشن جماعتوں کو ایک ساتھ لانے کی کوشش کر رہے ہیں۔ باہمی محبت اور بھائی چارہ ہو۔ عوام میں انتشار پیدا کرنے کی کوشش کی جا رہی ہے، اسے روکا جائے تاکہ ملک آگے بڑھ سکے۔

دہلی کے چیف منسٹر اروند کیجریوال نے کہا کہ سپریم کورٹ کے فیصلے کے آٹھ دن بعد مرکزی حکومت نے آرڈیننس لا کر اس فیصلے کو پلٹ دیا، جو کہ آئین کے خلاف ہے۔ انہوں نے کہا کہ اگر تمام اپوزیشن پارٹیاں متحد ہو جائیں تو اس آرڈیننس کو راجیہ سبھا میں قانون بننے سے روکا جا سکتا ہے۔ یہ 2024 کا سیمی فائنل ہوگا۔

بہار کے نائب چیف منسٹر تیجسوی یادو نے کہا کہ جمہوریت میں منتخب حکومت کو حقوق حاصل ہوتے ہیں لیکن غیر بی جے پی حکومت والی ریاست میں مرکز انہیں پریشان کر رہا ہے۔ انہوں نے کہا کہ اروند کیجریوال کو جن مسائل کا سامنا ہے ہم ان کی حمایت کرنے آئے ہیں۔ اگر دہلی میں بی جے پی کی حکومت ہوتی تو کیا لیفٹیننٹ گورنر میں ایسا کام کرنے کی ہمت ہوتی؟ دہلی میں بی جے پی کبھی واپس نہیں آئے گی۔ آپ اروند کیجریوال کو جتنا ستائیں گے، وہ اتنے ہی مضبوط ہوں گے۔ بی جے پی دہلی میں کبھی واپس نہیں آئے گی۔

اس موقع پر جنتا دل (یو) کے قومی صدر راجیو رنجن سنگھ عرف للن سنگھ، آر جے ڈی کے راجیہ سبھا ایم پی منوج جھا،اے اے پی کے ایم پی سنجے سنگھ اور دیگر لیڈران بھی موجود تھے۔