آندھرا پردیش حکومت کا خواتین کے لئے بڑا تحفہ۔این ٹی آر ودیا لکشمی اور این ٹی آر کلیان لکشمی اسکیموں کا آغاز

حیدرآباد: آندھرا پردیش کی چندرا بابو نائیڈو حکومت نے ڈواکرا گروپ کی خواتین کو معاشی طور پر مستحکم کرنے اور ان کے خاندانوں کی مدد کے لئے دو نئی اہم اسکیموں کے آغاز کا فیصلہ کیا ہے۔

ان اسکیموں کا افتتاح 3مارچ کو کیا جائے گا جو کہ سوسائٹی فار ایلیمینیشن آف رورل پاورٹی (ایس ای آرپی) کے قیام کی 25 ویں سالگرہ کا موقع بھی ہے۔

حکومت کی جانب سے این ٹی آر ودیا لکشمی اور این ٹی آر کلیانا لکشمی اسکیموں کے تحت ڈواکرا خواتین کے بچوں کی تعلیم اور ان کی شادیوں کے لئے استری ندھی بینک کے ذریعہ ایک لاکھ روپے تک کا قرض فراہم کیا جائے گا۔

یہ قرض صرف 25پیسے شرح سود پر دیا جائے گا۔ قرض کی واپسی کے لئے خواتین کو 48 ماہانہ اقساط کی سہولت دی جائے گی۔ ان اسکیموں کے لئے زیادہ کاغذی کارروائی کی ضرورت نہیں ہوگی۔

شادی کے لئے قرض حاصل کرنے کے لئے صرف شادی کا کارڈ (لگن پتریکا) اور اخراجات کا تخمینہ جمع کرانا ہوگاجس کے بعد یہ رقم براہ راست بینک کھاتوں میں جمع کروادی جایے گی۔حکومت نے ان دونوں اسکیموں کے نفاذ کے لئے 2,000 کروڑ روپے کے بجٹ کا تخمینہ لگایا ہے۔

اس کا فائدہ اٹھانے کے لئے خاتون کا کم از کم 6 ماہ سے کسی ڈواکرا گروپ کی رکن ہونا لازمی ہے۔ بائیومیٹرک تصدیق کی بنیاد پر مستحقین کو قرض جاری کیا جائے گا۔ وزیر اعلیٰ چندرا بابو نائیڈو 3 مارچ کو ان اسکیموں کا افتتاح کریں گے جبکہ خواتین کے عالمی دن (8 مارچ) کی مناسبت سے بھی ریاست بھر میں جشن کا اہتمام کیا جائے گا۔