2,929 کروڑ روپے کے قرض فراڈ کیس میں انیل امبانی 19–20 مارچ کو سی بی آئی کی تحقیقات میں شامل ہوں گے

نئی دہلی: انیل امبانی 19 اور 20 مارچ کو مرکزی تحقیقاتی بیورو (سی بی آئی) کی جانب سے کی جا رہی تحقیقات میں شامل ہوں گے۔ یہ تحقیقات ریلائنس کمیونیکیشنز سے جڑے مبینہ 2,929.05 کروڑ روپے کے قرض فراڈ کیس کے سلسلے میں ہیں۔ حکام نے یہ اطلاع دی۔

انیل ڈی. امبانی کے ترجمان نے یو این آئی کو بتایاکہ وہ دہلی میں ایجنسی کے سامنے 19 اور 20 مارچ کو پیش ہوں گے۔ یہ پیشی اس ایف آئی آر کے سلسلے میں ہے جو اسٹیٹ بینک آف انڈیا کی شکایت پر ریلائنس کمیونیکیشنز لمیٹڈ (آر کام) کے خلاف درج کی گئی تھی۔ کیس انیل امبانی اور دیگر کے خلاف درج ہے۔

ترجمان نے کہاکہ "یہ پیشی امبانی کے اس عزم کا حصہ ہے کہ وہ تمام ایجنسیوں کے ساتھ مکمل تعاون کریں گے۔”

اطلاعات کے مطابق، سی بی آئی نے 21 اگست 2025 کو ایف آئی آر درج کی تھی، جو ایس بی آئی ممبئی کی شکایت پر مبنی تھی۔ یہ شکایت ریلائنس کمیونیکیشنز لمیٹڈ، اس کے ڈائریکٹر انیل امبانی، نامعلوم سرکاری اہلکاروں اور دیگر کے خلاف تھی۔ الزام ہے کہ ایس بی آئی کو دھوکہ دے کر 2,929.05 کروڑ روپے کا نقصان پہنچایا گیا۔

تحقیقات میں الزام ہے کہ امبانی اور دیگر نے مبینہ طور پر مجرمانہ سازش رچی، حقائق کو غلط انداز میں پیش کیا اور ایس بی آئی سے آر کام کے حق میں کریڈٹ سہولیات حاصل کیں۔ بعد میں یہ قرض مبینہ طور پر غلط استعمال اور منتقل کیا گیا۔

سی بی آئی کے ایک افسر نے کہاکہ "الزامات میں قرض کے فنڈز کی ممکنہ منتقلی، انٹر کمپنی لین دین، سیلز انوائس فنانسنگ کا غلط استعمال، ریلائنس انفراٹیل لمیٹڈ کے ذریعے آر کام کے بلوں کی ڈسکاؤنٹنگ، انٹر کارپوریٹ ڈپازٹس کے ذریعے فنڈز کی نقل و حرکت، نیٹیزن انجینئرنگ پرائیویٹ لمیٹڈ (ریلائنس اے ڈی اے گروپ کی کمپنی) کو دیے گئے کیپیٹل ایڈوانسز کا لکھا جانا اور فرضی قرض داروں کی تخلیق/ختم کرنا شامل ہیں۔ ان اعمال کے ذریعے ملزمان پر مجرمانہ سازش، دھوکہ دہی اور امانت میں خیانت کے جرائم کا الزام ہے۔”

سی بی آئی نے 22 اگست 2025 کو ممبئی کی خصوصی سی بی آئی عدالت میں درخواست دائر کر کے انیل امبانی اور دیگر کے خلاف سرچ وارنٹ حاصل کیا تھا۔

مزید تحقیقات جاری ہیں۔