بہار سے بنگالورو جانوروں کی منتقلی، گاڑی تلنگانہ میں حادثہ کا شکار، دو مگرمچھ باہر نکل گئے

حیدرآباد: تلنگانہ کے ضلع نرمل میں جانوروں کو منتقل کرنے والی گاڑی حادثہ کا شکارہوگئی جس کے نتیجہ میں دومگرمچھ گاڑی سے نکل پڑے۔

یہ حادثہ ضلع کے مونڈی گوٹ گاوں کے قریب اُس وقت پیش آیا جب بہار کے دارالحکومت پٹنہ کے سنجے گاندھی نیشنل زو پارک سے مختلف اقسام کے جنگلی جانوروں کو بنگالورو کے بانیراگٹا نیشنل زو پارک منتقل کرنے کیلئے جانے والی دوگاڑیوں میں سے ایک گاڑی کا توازن ڈرائیور نے مونڈی گوٹ گاؤں کے قریب کھودیا جس کے نتیجہ میں یہ گاڑی الٹ گئی۔

ا س حادثہ کے ساتھ ہی 8 مگرمچھ میں سے دو باہر نکل آئے، تاہم مقامی جنگلات کے حکام نے فوری حفاظتی اقدامات کرکے انہیں پکڑلیا۔

تمام جانوروں کو دوسری گاڑی میں بنگالورو روانہ کیا گیا۔گاڑی میں موجود تمام دیگر جانور محفوظ رہے۔ ان میں مگرمچھ اور نایاب سفید شیر بھی شامل تھے۔

ایس پی نرمل ضلع جانکی شرمیلا نے اس آپریشن کی نگرانی کی۔