پون کھیڑا کو سپریم کورٹ سے28 فروری تک عبوری ضمانت

نئی دہلی: سپریم کورٹ نے آج حکم دیا کہ کانگریس قائد پون کھیڑا کو جنہیں آسام پولیس نے وزیراعظم نریندر مودی کے خلاف ان کے مبینہ تبصرہ پر گرفتار کیا ہے‘ 28 فروری تک عبوری ضمانت پر رہا کیا جائے۔

چیف جسٹس ڈی وائی چندرچوڑ کی زیرصدارت سہ رکنی بنچ نے کہا کہ دہلی میں بااختیار مجسٹریٹ کے روبرو پیش کئے جانے پر کھیڑا کو عبوری ضمانت پر رہا کیا جائے۔

بنچ نے جس میں جسٹس ایم آر شاہ اور جسٹس پی ایس نرسمہا بھی شامل تھے‘ کہا کہ مذکورہ حکم منگل (28 فروری) تک کارکرد رہے گا اور اس معاملہ کی مزید سماعت 27 فروری کو مقرر کی۔

عدالت عظمیٰ نے آسام اور اترپردیش کو نوٹسیں جاری کی ہیں اور وزیراعظم نریندر مودی کے خلاف مبینہ تبصرہ پر آسام‘ لکھنو اور وارانسی میں ان کے خلاف درج کرائی گئی متعدد ایف آئی آر کو یکجا کرنے کھیڑا کی درخواست پر ان (پولیس) سے جواب مانگا ہے۔