اے پی:تلگودیشم لیڈربی ٹیک روی گرفتار

حیدرآباد: آندھراپردیش کی اصل اپوزیشن جماعت تلگودیشم کے سابق ایم ایل سی و پُلی ویندلہ حلقہ کے انچارج ایم رویندرناتھ ریڈی جو بی ٹیک روی کے نام سے مشہور ہیں کو منگل کی شب پولیس نے گرفتارکرلیا۔

ان کی گرفتاری پر حالانکہ پولیس لب کشائی سے گریز کررہی ہے، تاہم سمجھاجاتا ہے کہ یووا گلم پدیاترا کے موقع پر جاریہ سال کے اوائل میں سابق وزیراعلی این چندرابابونائیڈو کے فرزند وپارٹی کے جنرل سکریٹری لوکیش کے پاس پہنچی پولیس کے ساتھ ان کے نامناسب رویہ پر ان کے خلاف ویلورپولیس اسٹیشن میں درج کردہ مقدمہ کے سلسلہ میں ان کو گرفتار کیاگیا ہے۔

روی، پُلی ویندلہ حلقہ سے وزیراعلی وائی ایس جگن موہن ریڈی کے خلاف مقابلہ کرنے والے ہیں۔

پارٹی کی جانب سے ان کی امیدواری کے اعلان کے بعد سے ہی وہ اس حلقہ میں سرگرمی سے دورے کررہے ہیں۔

روی کو گرفتار کرتے ہوئے مجسٹریٹ کے سامنے پیش کیاگیا جنہوں نے انہیں 14دنوں کے لئے عدالتی تحویل میں دے دیا جس کے بعد ان کو سنٹرل جیل منتقل کردیاگیا۔