اشون کا قہر، ہندوستان نے بنگلہ دیش کو 280 رنز سے شکست دی

چنئی: روی چندرن اشون (چھ وکٹ) اور رویندر جڈیجہ (تین وکٹ) کی مہلک گیند بازی کی وجہ سے ہندوستان نے پہلے ٹیسٹ میچ کے چوتھے دن اتوار کے روز صبح کے سیشن میں بنگلہ دیش کو 234 رن کے اسکور پر ڈھیر کرکے 280 رن سے شکست دے دی۔ اس کے ساتھ ہی ہندوستان نے دو ٹیسٹ میچوں کی سیریز میں 1-0 کی برتری حاصل کر لی ہے۔

چناسوامی اسٹیڈیم میں میچ کے چوتھے دن بنگلہ دیش کی ٹیم نے کل چار وکٹ پر 158 رنز سے آگے کھیلنا شروع کیا۔ 52ویں اوور میں اشون نے شکیب الحسن (25) کو آؤٹ کر کے ہندوستان کو پانچویں اور آج کی پہلی کامیابی دلائی۔ اس کے بعد بیٹنگ کے لیے آنے والے لٹن کمار داس (1) کو جڈیجہ نے پویلین بھیج دیا۔

مہدی حسن معراج (8) اور تسکین احمد (5) ایویشان کا شکار بنے۔ 57 ویں اوور میں جڈیجہ نے کپتان نجمل شانتو (82) کی وکٹ گرادی۔ حسن محمود (7) 63ویں اوور کی پہلی گیند پر بولڈ ہو گئے جس سے بنگلہ دیش کی دوسری اننگز 234 کے اسکور پر ختم ہو گئی۔

ہندوستان کی جانب سے آر اشون نے چھ وکٹیں حاصل کیں۔ رویندر جڈیجہ نے تین وکٹیں حاصل کیں۔ جسپریت بمراہ نے ایک بلے باز کو آؤٹ کیا۔

اس سے قبل گزشتہ روز شبھمن گل (119 ناٹ آؤٹ) اور رشبھ پنت (109) کے درمیان 167 رنز کی شراکت کے بعد ہندوستان نے روی چندرن اشون (تین وکٹ) کی اسپن کی بدولت بنگلہ دیش کے خلاف پہلے ٹیسٹ میچ میں اپنی گرفت مضبوط کر لی تھی۔

تیسرے دن وقفے کے بعد ہندوستان نے اپنی دوسری اننگز 287 رنز چار وکٹوں پر ڈیکلیئر کر دی اور مہمان ٹیم کو جیت کے لیے 515 رنز کا ہدف دیا۔

ہندوستان نے اپنی پہلی اننگز میں 376 رنز بنائے تھے اور گیند بازوں نے بنگلہ دیش کو پہلی اننگز میں 149 رنز پر آؤٹ کر دیا تھا۔ پہلی اننگز میں 227 رنز کی برتری کے ساتھ ہندوستان نے اپنی دوسری اننگز میں 287 رنز بنائے اور 514 رنز کی برتری حاصل کرتے ہوئے مہمان ٹیم کو جیت کے لیے 515 رنز کا مضبوط ہدف دیا۔ جس کے جواب میں آج چوتھے روز بنگلہ دیش کی ٹیم 234 کے اسکور پر ڈھیر ہوگئی۔