انتخابات کے لیے شادی، محبوبہ کو چیئرپرسن بنانے کی کوشش ناکام

سالور: آندھرا پردیش کے سالور میونسپل انتخابات میں ایک دلچسپ سیاسی واقعہ سامنے آیا ہے، جہاں تلگو دیشم پارٹی (ٹی ڈی پی) کے ایک لیڈر ہرش وردھن نے اپنی محبوبہ منجیرا سے عجلت میں مندر میں شادی کرلی، تاکہ وہ میونسپل چیئرپرسن کے عہدے کے لیے انتخاب لڑ سکیں۔

اطلاعات کے مطابق، سالور میونسپل چیئرپرسن کی نشست پسماندہ طبقے (بی سی) کی خاتون کے لیے مختص کی گئی تھی۔ تاہم، اتحادی جماعتوں کے درمیان نشستوں کی تقسیم میں یہ نشست جنا سینا پارٹی کے حصے میں چلی گئی، جس کے باعث ٹی ڈی پی لیڈر ہرش وردھن کو مایوسی ہوئی۔

اس کے بعد ہرش وردھن نے بغیر کسی کو مدعو کیے مندر میں اپنی محبوبہ منجیرا سے شادی کرلی۔

بعد ازاں منجیرا نے آزاد امیدوار کی حیثیت سے انتخابی میدان میں قدم رکھا، لیکن انہیں شکست کا سامنا کرنا پڑا اور وہ چیئرپرسن کا عہدہ حاصل کرنے میں ناکام رہیں۔

دوسری جانب، ہرش وردھن نے وارڈ نمبر 21 سے کامیابی حاصل کی، تاہم اپنی اہلیہ کی انتخابی شکست اور چیئرپرسن کا عہدہ حاصل نہ کرپانے پر وہ مایوس ہوگئے۔

شادی اور انتخابی سیاست سے جڑے اس غیر معمولی واقعہ نے مقامی سیاسی حلقوں میں توجہ حاصل کرلی ہے۔