تلنگانہ۔مہاراشٹر سرحد پر ریچھ کا 8 افراد پرحملہ۔ایک شخص ہلاک۔7شدیدزخمی

حیدرآباد: تلنگانہ اور مہاراشٹر کی سرحد پر واقع ضلع عادل آباد کے بوتھ منڈل کے دیال دنور علاقہ میں ایک ریچھ کے حملہ نے دہشت پھیلا دی ہے، اس جنگلی جانور نے 8افراد پر حملہ کر دیا جس کے نتیجہ میں ایک شخص ہلاک ہوگیا اور سات دیگر شدید زخمی ہوگئے۔

واقعہ کے بعد محکمہ جنگلات کے حکام نے فوری کارروائی کرتے ہوئے ریچھ کو بے ہوشی کا انجکشن دے کرپکڑلیا۔ اسی طرح کی ایک اور واردات میں اے پی کے ضلع تروپتی کے اوبلا واری پلی منڈل میں تین ریچھوں نے انسانی بستیوں میں گھس کر خوف و ہراس پیدا کر دیا ہے۔

بال ریڈی پلی گاؤں میں ریچھوں نے امرناتھ ریڈی نامی شخص کے بشمول تین افراد پر حملہ کر کے انہیں زخمی کر دیا تاہم دیہاتیوں نے شور مچا کر اور لاٹھیوں کی مدد سے ریچھوں کو وہاں سے بھگا دیا ۔

مقامی افرادکے مطابق یہ ریچھ گزشتہ چند دنوں سے مویشیوں پر بھی حملے کر رہے ہیں جس کی وجہ سے کسانوں اور دیہاتیوں میں شدید بے چینی پائی جا رہی ہے۔