مہاراشٹرا میں کانگریس کو بڑا جھٹکا – سابق وزیر بابا صدیقی نے پارٹی چھوڑی

ممبئی: مہاراشٹر کانگریس کو آج اسوقت ایک بڑا جھٹکا لگا جب پارٹی کے سینئر رہنما اور ممبئ کے مضافات کے طاقتور مسلم لیڈر ، و سابق وزیر بابا ضیاء الدین صدیقی نے جمعرات کو یہاں پارٹی کی بنیادی رکنیت سے مستعفی ہونے کا اعلان کیا۔

صدیقی جو تقریباً 48 سالوں سے پارٹی کے وفادار تھے، انہوں نے اپنے عہدے سے استعفیٰ دینے کا اعلان ٹویٹر پر کیا ہے۔

صدیقی نے اپنے پیغام میں کہا”میں نے انڈین نیشنل کانگریس پارٹی میں ایک نوجوان کے طور پر شمولیت اختیار کی تھی اور یہ 48 سال پر محیط ایک اہم سفر رہا ہے… میں بہت کچھ بیان کرنا چاہوں گا لیکن جیسا کہ وہ کہتے ہیں، کچھ چیزوں کو ان کہی چھوڑ دینا بہتر ہے،”

اگرچہ بابا صدیقی نے اپنے مستقبل کے منصوبوں کا اشارہ نہیں دیا ہے، لیکن سیاسی حلقوں میں قیاس آرائیاں کی جا رہی ہیں کہ وہ نائب وزیراعلی اجیت پوار کی قیادت والی نیشنلسٹ کانگریس پارٹی میں شمولیت اختیار کرسکتے ہیں ۔

صدیقی دو مرتبہ 1992 اور 1997 میں میونسپل کارپوریٹر منتخب ہوئے تھے ، اور باندرہ ویسٹ اسمبلی حلقہ سے 1999، 2004 اور 2009 میں تین مرتبہ باندرہ ویسٹ اسمبلی حلقہ سے ایم ایل اے کے طور پر خدمات انجام دیے چکے ہیں۔

اتفاق سے، ان کے بیٹے، 34 سالہ ذیشان صدیقی، باندرہ مشرقی حلقہ سے موجودہ کانگریس ایم ایل اے ہیں، اور اس کے رہنما بھی ہیں۔