سوشیل میڈیاقومی
ٹرینڈنگ

دلت خاتون کو خون عطیہ کرنے گئے مسلم نوجوان کی مبینہ پٹائی، دوران علاج موت

بہار کے اورنگ آباد میں اسپتال مالک پر مسلم نوجوان کو کمرے میں بند کرکے لاٹھیوں اور لوہے کی سلاخوں سے پیٹنے کا الزام، پٹنہ میں دوران علاج موت، غیر جانبدارانہ تحقیقات کا مطالبہ۔

پٹنہ: بہار کے ضلع اورنگ آباد میں ایک دلت خاتون کو خون عطیہ کرنے کے لیے اسپتال پہنچنے والے مسلم نوجوان کی مبینہ پٹائی کے بعد موت ہوگئی۔ متوفی کی شناخت سکندر خان کی حیثیت سے کی گئی ہے، جو چَرکُپّا گاؤں کا رہنے والا تھا۔ اطلاعات کے مطابق وہ علاج کے دوران پٹنہ میں زخموں کی تاب نہ لاتے ہوئے دم توڑ گیا۔

موصولہ اطلاعات کے مطابق سکندر خان ایک واقف کار خاتون کو خون عطیہ کرنے کے لیے ضلع اورنگ آباد کے رفی گنج میں واقع ایک اسپتال پہنچا تھا۔ بتایا جاتا ہے کہ خاتون کا تعلق دلت خاندان سے تھا۔ اسی دوران خاتون کے علاج کے معاملے پر اسپتال انتظامیہ اور سکندر خان کے درمیان بحث ہوگئی۔

مقامی صحافی سیماَب (ہندوستان ٹی وی) کی جانب سے سوشل میڈیا پر جاری کردہ بیان کے مطابق، بحث کے بعد اسپتال کے مالک ڈاکٹر رنجیت یادو نے مبینہ طور پر سکندر خان پر حملہ کردیا۔ صحافی نے الزام لگایا کہ سکندر کو ایک کمرے میں بند کرکے لاٹھیوں اور لوہے کی سلاخوں سے بری طرح پیٹا گیا۔ اس واقعہ میں اسپتال کے عملے کے ملوث ہونے کا بھی دعویٰ کیا گیا ہے۔

صحافی کے مطابق، سکندر خان کو شدید زخمی حالت میں علاج کے لیے منتقل کیا گیا، تاہم بعد ازاں پٹنہ میں دوران علاج اس کی موت ہوگئی۔ انہوں نے یہ الزام بھی عائد کیا کہ حملے کے وقت قریب ہی پولیس اہلکار موجود تھے۔

صحافی سیماَب نے اپنے ویڈیو بیان میں سکندر خان کو دوسروں کی مدد کرنے والا شخص قرار دیتے ہوئے اس کی موت پر افسوس کا اظہار کیا۔ انہوں نے آر جے ڈی لیڈر اور بہار اسمبلی میں قائد اپوزیشن تیجسوی یادو سے ڈاکٹر رنجیت یادو کے ساتھ مبینہ سیاسی روابط کے بارے میں سوالات اٹھائے اور دعویٰ کیا کہ ڈاکٹر کی تیجسوی یادو کے ساتھ تصاویر سوشل میڈیا پر موجود ہیں۔

انہوں نے تیجسوی یادو سے مطالبہ کیا کہ وہ متوفی کے خاندان سے ملاقات کریں اور واقعہ میں ملوث افراد کے خلاف سخت کارروائی کا مطالبہ کریں۔ صحافی نے پولیس کے مبینہ رویے پر بھی سوال اٹھاتے ہوئے الزام لگایا کہ پولیس اسٹیشن میں ملزم کے ساتھ نرمی برتی جارہی ہے۔

دوسری جانب سکندر خان کی موت پر جاری ایک بیان میں کہا گیا کہ وہ ایک بیمار دلت خاتون کو خون عطیہ کرنے انسانیت کے جذبے کے تحت اسپتال گیا تھا۔ بیان میں واقعہ کی غیر جانبدارانہ تحقیقات اور قصوروار پائے جانے والے تمام افراد کے خلاف سخت قانونی کارروائی کا مطالبہ کیا گیا۔

تاہم، دستیاب اطلاعات میں پولیس کا کوئی باضابطہ بیان، ملزم کی گرفتاری یا اسپتال انتظامیہ کا مؤقف سامنے نہیں آیا ہے۔ واقعہ کی مکمل تفصیلات اور حملے کے حالات کی سرکاری طور پر تصدیق ہونا ابھی باقی ہے۔

(بشکریہ:theobserverpost)