حیدرآباد کے شمس آباد ایرپورٹ پرطیارہ سے پرندہ ٹکراگیا،مسافرین محفوظ

حیدرآباد: شہرحیدرآباد کے شمس ایئرپورٹ پر جے پور سے آنے والے انڈیگو کے طیارہ (6E 752) کی ساتھ لینڈنگ کے دوران پرندہ ٹکرانے کا واقعہ پیش آیا۔

جے پور سے حیدرآباد پہنچی اس فلائٹ کے پائلٹ کو لینڈنگ کے وقت طیارہ سے پرندہ ٹکرانے کا شبہ ہوا جس پر انہوں نے فوری چوکسی دکھاتے ہوئے طیارہ کو محفوظ طریقے سے رن وے پر اتار لیا۔

لینڈنگ کے بعد پائلٹ نے ایئر ٹریفک کنٹرول حکام کو اس بارے میں اطلاع دی اور شکایت درج کروائی۔

ایئرپورٹ حکام اور انجینئرس کی ٹیم نے طیارے کو اپنی تحویل میں لے کر اس کا تکنیکی معائنہ شروع کر دیا ہے تاکہ پرندہ کے ٹکرانے سے ہونے والے ممکنہ نقصان کا جائزہ لیا جا سکے۔ خوش قسمتی سے تمام مسافر اور عملہ مکمل طور پر محفوظ ہیں۔