مدھیہ پردیش انتخابات میں بھی بی جے پی کا صفایا ہوگا: ڈگ وجئے سنگھ

انوپ پور: کانگریس کے سینئر لیڈر دگ وجے سنگھ نے کرناٹک میں زبردست اکثریت سے جیت پر پارٹی کی اعلیٰ قیادت کو مبارکباد دیتے ہوئے آج دعویٰ کیا کہ مدھیہ پردیش میں انتخابات کے بعد بھارتیہ جنتا پارٹی کا وسطی ہندوستان سے صفایا ہو جائے گا۔

مسٹر سنگھ نے یہاں نامہ نگاروں سے بات چیت کے دوران کہا کہ کرناٹک میں کانگریس کی جیت پر پارٹی کارکنان اور ریاستی قیادت مبارکباد کے مستحق ہیں۔

اس کے ساتھ انہوں نے کہا کہ اس جیت کا سہرا خاص طور پر پارٹی صدر ملکارجن کھڑگے، سینئر لیڈر سونیا گاندھی کو جاتا ہے، جو خرابی صحت کے بعد بھی انتخابی مہم کے لیے وہاں گئے تھے۔ انہوں نے اس کے لیے پارٹی لیڈر راہل گاندھی کو بھی مبارکباد دی۔

مسٹر سنگھ نے کہا کہ کرناٹک میں شکست کے ساتھ ہی بی جے پی کا جنوب سے صفایا ہو گیا ہے۔ اس کے ساتھ ہی انہوں نے دعویٰ کیا کہ مدھیہ پردیش کے انتخابات کے بعد سبھی دیکھیں گے کہ وسطی ہندوستان سے بھی بی جے پی کا صفایا ہوجائے گا۔ اس بار کانگریس کو مدھیہ پردیش میں بھی اتنی اکثریت ملے گی کہ جوڑ توڑ کی کوئی گنجائش نہیں رہے گی۔