بی ایم سی انتخابات کے نتائج کا اعلان آج ہوگا، ووٹوں کی گنتی صبح 10 بجے شروع ہوگی

ممبئی: مہاراشٹر کے 29 میٹروپولیٹن بلدیاتی انتخابات کے ووٹوں کی گنتی جمعہ کو صبح 10 بجے شروع ہوگی۔

غور طلب ہے کہ ریاست میں جمعرات کو بلدیاتی انتخابات ہوئے تھے۔ اس کے بعد سخت سکیورٹی میں ای وی ایم، بی ایم سی کے وکرولی، کاندیولی میں واقع گودام میں پہنچادی گئی ہے۔

برہن ممبئی میونسپل کارپوریشن (بی ایم سی) کے انتخابات میں 227 سیٹوں کے لیے تقریباً 1,700 امیدوار قسمت آزما رہے ہیں۔ ملک کی سب سے امیر میونسپل باڈی پر قبضے کی لڑائی میں بھارتیہ جنتا پارٹی (بی جے پی) کی زیر قیادت مہایوتی اور ادھو ٹھاکرے-راج ٹھاکرے اتحاد کے درمیان قریبی مقابلہ ہونے کی امید ہے۔

ووٹرز نے جمعرات کو کل 29 میونسپل باڈیز میں 893 وارڈوں کی 2,869 نشستوں کے لیے اپنا ووٹ ڈالا۔

ووٹوں کی گنتی کے لیے 23 گنتی مراکز بنائے گئے ہیں جہاں دو دو ڈویژنوں کے ووٹوں کی بیک وقت گنتی کی جائے گی۔ اس مقصد کے لیے 23 ریٹرننگ افسران تعینات کیے گئے ہیں۔

بی ایم سی کمشنر بھوشن گگرانی نے جمعرات کی شام ووٹوں کی گنتی کی تیاریوں کا معائنہ کیا۔ انہوں نے کہا کہ 2,299 افسران اورملازمین کو تعینات کیا گیا ہے۔