ویلی گونڈا پروجیکٹ کے سیلابی پانی میں بولیرو بہہ گئی، تین افراد کو ریسکیو کرلیا گیا، ایک لاپتہ
اطلاعات کے مطابق یہ واقعہ پیر کی رات پیش آیا۔ پیڈّاراویڈو منڈل کے کالانوتلا گاؤں سے تعلق رکھنے والے چار افراد تقریباً رات 7 بجے کیلے کے تنوں کو جمع کرنے کے لیے بولیرو گاڑی میں روانہ ہوئے تھے۔ اس وقت حکام کی جانب سے سیلاب سے متاثرہ دیہات کو خالی کرانے کا عمل بھی جاری تھا۔
پراکاشم: آندھرا پردیش کے ویلی گونڈا پروجیکٹ سے نلّامالا ساگر کی جانب بہنے والے کرشنا ندی کے تیز بہاؤ میں ایک بولیرو گاڑی بہہ گئی۔ حادثے میں تین افراد کو ریسکیو ٹیموں نے بحفاظت بچا لیا، جبکہ ایک شخص لاپتہ ہوگیا۔
اطلاعات کے مطابق یہ واقعہ پیر کی رات پیش آیا۔ پیڈّاراویڈو منڈل کے کالانوتلا گاؤں سے تعلق رکھنے والے چار افراد تقریباً رات 7 بجے کیلے کے تنوں کو جمع کرنے کے لیے بولیرو گاڑی میں روانہ ہوئے تھے۔ اس وقت حکام کی جانب سے سیلاب سے متاثرہ دیہات کو خالی کرانے کا عمل بھی جاری تھا۔
بتایا گیا ہے کہ راستے میں ایک نالے کو عبور کرتے ہوئے اچانک پانی کا بہاؤ تیز ہوگیا اور بولیرو گاڑی تیز دھارے کی زد میں آکر بہہ گئی۔ گاڑی میں سوار ایک شخص گاڑی کے ساتھ ہی لاپتہ ہوگیا، جبکہ دیگر تین افراد نے درختوں پر چڑھ کر اپنی جان بچائی اور مدد کے لیے چیخ پکار کی۔
واقعے کی اطلاع ملتے ہی ریسکیو اہلکار موقع پر پہنچے اور درختوں پر پھنسے تینوں افراد کو بحفاظت نیچے اتار کر محفوظ مقام پر منتقل کیا۔
لاپتہ شخص اور بہہ جانے والی گاڑی کی تلاش کے لیے سرچ آپریشن جاری ہے۔ حکام نے مقامی لوگوں سے اپیل کی ہے کہ وہ سیلابی پانی، ندی نالوں اور تیز بہاؤ والے علاقوں میں جانے سے گریز کریں۔
واضح رہے کہ ویلی گونڈا پروجیکٹ کا افتتاح آندھرا پردیش کے وزیر اعلیٰ این چندرا بابو نائیڈو نے کیا تھا، جس کے بعد پروجیکٹ سے پانی نلّامالا ساگر کی سمت بہہ رہا ہے۔
