آئی ویژن یوتھ پارلیمنٹ میں گورنمنٹ بوائز ہائی اسکول مغل پورہ نمبر 2 کے طلبہ کا شاندار مظاہرہ
حاجرہ فاطمہ نے کہا کہ تلنگانہ ایک زرعی ریاست ہے اور کسانوں کو جدید ٹکنالوجی اپنا کر اپنی آمدنی میں اضافہ کرنا چاہیے۔ نازیہ بیگم نے کہا کہ معاشی ترقی صرف فیکٹریاں لگانے سے نہیں بلکہ نوجوانوں کو ہنر مند بنا کر ممکن ہے۔
حیدرآباد: گورنمنٹ بوائز ہائی اسکول مغل پورہ نمبر 2 (چارمینار منڈل) کے طلبہ و طالبات نے آئی ویژن یوتھ پارلیمنٹ مقابلہ میں شاندار کارکردگی کا مظاہرہ کرتے ہوئے اپنے اسکول اور سرکاری اردو میڈیم تعلیمی نظام کا نام روشن کیا۔ آئی ویژن یوتھ پارلیمنٹ مقابلے کا فائنل 7 جنوری 2026 کو لٹل فلاور ہائی اسکول، چراغ علی گلی میں منعقد ہوا، جس کا اہتمام اکشنا مارکیٹنگ کی جانب سے کیا گیا تھا۔ اس پروگرام کی سرپرستی ضلع کلکٹر حیدرآباد محترمہ ہری چندنا دساری آئی اے ایس اور ڈسٹرکٹ ایجوکیشنل آفیسر حیدرآباد نے کی۔
اس یوتھ پارلیمنٹ کا مقصد سرکاری اسکولوں کے طلبہ کو جمہوری عمل سے روشناس کرانا اور ان میں قائدانہ صلاحیتوں کو فروغ دینا تھا۔ حیدرآباد ضلع کے سرکاری اسکولوں سے جماعت ششم تا نہم کے تقریباً 260 کامیاب طلبہ نے اقوام متحدہ، بھارتی پارلیمنٹ اور تلنگانہ ویژن 2047 کمیٹیوں میں حصہ لیا۔
گورنمنٹ بوائز ہائی اسکول مغل پورہ نمبر 2 کے طلبہ نے نمایاں کارکردگی پیش کی۔ محمد ثاقب (جماعت نہم) نے اقوام متحدہ کمیٹی میں بھارتی مندوب کے طور پر شرکت کی۔ شازیہ بیگم (جماعت نہم) اور نازیہ بیگم (جماعت ہفتم) نے بھارتی پارلیمنٹ میں وزرائے تعلیم کے کردار ادا کیے، جبکہ حاجرہ فاطمہ (جماعت ہفتم) نے تلنگانہ ویژن 2047 کمیٹی میں وزیرِ زراعت کے طور پر حصہ لیا۔
صدر معلمہ محترمہ اوما موپیڈی کی قیادت اور محترمہ اختر النساء (ایس اے حیاتیاتی سائنس) اور محترمہ امتہ الرحمن بشریٰ (ایس اے انگریزی) کی رہنمائی میں طلبہ نے نہایت اعتماد اور وضاحت کے ساتھ اپنی صلاحیتوں کا مظاہرہ کیا۔ ان کی شاندار کارکردگی نے یہ ثابت کر دیا کہ سرکاری اردو میڈیم کے طلبہ بھی کسی سے کم نہیں۔
یوتھ پارلیمنٹ میں شاندار مظاہرہ کرنے پر 8 جنوری کو اسکول اسمبلی میں طلبہ و طالبات کو تہنیت پیش کی گئی۔ اس موقع پر نہم جماعت کی طالبہ شازیہ بیگم نے اپنے خطاب میں کہا کہ لڑکیوں کی تعلیم معاشی ترقی میں اہم کردار ادا کرتی ہے۔ تعلیم یافتہ لڑکیاں خود مکتفی بنتی ہیں اور خاندان و معاشرے کی مضبوطی میں اہم کردار ادا کرتی ہیں۔
حاجرہ فاطمہ نے کہا کہ تلنگانہ ایک زرعی ریاست ہے اور کسانوں کو جدید ٹکنالوجی اپنا کر اپنی آمدنی میں اضافہ کرنا چاہیے۔ نازیہ بیگم نے کہا کہ معاشی ترقی صرف فیکٹریاں لگانے سے نہیں بلکہ نوجوانوں کو ہنر مند بنا کر ممکن ہے۔
اس موقع پر اسکول کے اساتذہ کرام جناب محمد جہانگیر، جناب محمد حسام الدین، جناب یس پانڈو، محترمہ مہر حبیب، محترمہ اختر النساء، محترمہ نذیرہ وسیم، محترمہ روحی فاطمہ، محترمہ کے ونیتا، محترمہ بی مادھوی، محترمہ طاہرہ بیگم، محترمہ امتہ الرحمن بشریٰ، محترمہ بی وجے لکشمی، محترمہ عالیہ مہہ جبین اور محترمہ شمیم نے طلبہ و طالبات کو دل کی گہرائیوں سے مبارکباد پیش کی اور دیگر طلبہ کو بھی ایسے تعلیمی پروگراموں میں حصہ لینے کی ترغیب دی۔
صدر معلمہ محترمہ اوما موپیڈی نے یوتھ پارلیمنٹ کی تیاری میں اہم کردار ادا کرنے والی معلمات محترمہ اختر النساء اور محترمہ امتہ الرحمن بشریٰ کی بھرپور ستائش کی اور ان کی خدمات کو سراہا۔
