ہر گزرتے دن بی آر ایس کی پریشانیوں میں اضافہ

حیدرآباد:اسمبلی انتخابات جیسے جیسے قریب آتے جارہے ہیں ویسے ہی حکمراں جماعت بی آر ایس کی پریشانیوں میں اضافہ ہوتا جارہا ہے۔ ان اطلاعات کے درمیان کہ پارٹی سربراہ آئندہ ایک دو روز میں امیدواروں کی پہلی فہرست جاری کرنے والے ہیں، بی آر ایس کارکنوں میں تشویش بڑھتی جارہی ہے۔

کئی مقامات پر موجودہ ارکان اسمبلی کو دوبارہ امیدوار نہ بنانے کیلئے پارٹی قائدین کھلے عام مطالبہ کررہے ہیں۔ ضلع بھدرادری کے حلقہ اسمبلی یلندو کے رکن اسمبلی بی ہری پریہ کے خلاف بھی حلقہ میں شدید ناراضگی پائی جارہی ہے۔

 ان کو دوبارہ امیدوار نہ بنانے کا مطالبہ کرتے ہوئے پارٹی قائدین نے محاذ کھول رکھا ہے۔ صدرنشین یلندو بلدیہ ڈی وینکٹیشور راؤ کی قیامگاہ پر ناراض قائدین کا اجلاس منعقد کیا گیا۔ پارٹی قیادت سے مطالبہ کیا گیا کہ ہری پریہ کو دوبارہ امیدوار نہ بنائیں۔

 دوسری طرف اگر ہری پریہ کو امیدوار بنایا جاتا ہے تو انہیں اپوزیشن جماعتوں کے علاوہ اپنی ہی جماعت کے قائدین کی مخالفت کا سامنا ہوگا جو مہنگا ثابت ہوسکتا ہے۔