تلنگانہ میں ”ملٹی پرپز ہیلت اسسٹنٹ“ ملازمتوں کی تعداد میں اضافہ:ہریش راؤ

حیدرآباد: تلنگانہ کے وزیرصحت ہریش راو نے کہا کہ ریاست میں ”ملٹی پرپز ہیلت اسسٹنٹ“ ملازمتوں کی تعداد میں اضافہ کیاجارہا ہے۔ انہوں نے اس سلسلہ میں ٹوئیٹ کرتے ہوئے کہا کہ حال ہی میں 1520ملازمتوں کو پُرکرنے کا اعلامیہ جاری کیاگیا ہے۔

مزید 146ملازمتوں کو پُرکرنے کا اعلان کیاگیا ہے۔ انہوں نے کہا کہ نئی ملازمتوں کے ساتھ جملہ پُر کی جانے والی ملازمتوں کی تعداد 1666ہوگئی ہے۔

 انہوں نے کہاکہ اس کے علاوہ، حکومت نے اسپتالوں اور دیگر صحت کے پروگراموں میں کام کرنے والے کنٹریکٹ اور آؤٹ سورسنگ ملازمین کے لیے مواقع میں اضافہ کے لیے ان کے تقررکے عمل میں تبدیلیاں کرنے کا فیصلہ کیا ہے۔

 ہریش راؤ نے انکشاف کیا کہ تقررپانے کیلئے زیادہ سے زیادہ عمر کی حد 44 سے بڑھا کر 49 سال کر دی گئی ہے۔ سروس ویٹیج کے تحت دیئے گئے نمبروں کو بھی 20 سے بڑھا کر 30 کرنے کے اقدامات کئے جارہے ہیں۔ تحریری امتحان کے لیے پہلے 80 نمبر ہوتے تھے اب اسے کم کر کے 70 نمبر کر دیا گیا ہے۔