اپوزیشن کے صدور کو تبدیل کرنے کے باوجود تلنگانہ میں بی آر ایس کی ہیٹ ٹرک ہوگی:وزیرصحت

حیدرآباد: تلنگانہ کے وزیر صحت ہریش راو نے کہا ہے کہ اپوزیشن جماعتوں کے صدور کو تبدیل کرنے کے باوجود ریاست میں بی آر ایس کی ہیٹ ٹرک ہوگی۔

بی جے پی اور کانگریس کتنی ہی چالیں نہ چلے،بی آرایس کی ہی ہیٹ ٹرک ہوگی۔

انہوں نے سنگاریڈی ضلع میں نو تعمیر شدہ فریڈم پارک، ڈی سی سی بی بینک، آر اینڈ بی گیسٹ ہوز کی افتتاحی تقریب سے خطاب کرتے ہوئے کہا کہ مرکز نے ریاست کو فنڈس اور دیگر معاملات میں دھوکہ دیا ہے۔

انہوں نے کہا کہ کوچ فیکٹری ریاست کو نہیں دی گئی۔

انہوں نے کہاکہ اگربی جے پی نے جنوبی ہند کی ریاستوں کو کچھ دیا ہے تو صرف وعدے دیئے۔

یہ انتہائی شرم کی بات ہے کہ اپوزیشن جماعتیں تمام مسترد شدہ لیڈروں کو پارٹی میں لے رہی ہیں۔

انہوں نے نشاندہی کرتے ہوئے کہا کہ بی آر ایس حکومت عوام کی امنگوں کے مطابق کام کرتی ہے۔

انہوں نے پوچھا کہ کیا کانگریس اور بی جے پی کی حکومت والی ریاستوں میں رعیتو بندھو، رعیتوبیمہ، کلیانا لکشمی، کے سی آر کٹس جیسی اسکیمیں ہیں؟

انہوں نے کہاکہ آلودگی کا شکار پٹن چیرو بی آرایس کی قیادت میں دن بدن ترقی کر رہا ہے۔

انہوں نے کہاکہ وزیر اعلیٰ نے انتخابات میں کامیابی پر پٹن چیرو کو میٹرو ٹرین دینے کا وعدہ کیا ہے۔