کمسن پوتی کو کار چلانے دینے پر سائبرآباد کے ایس آئی کے خلاف مقمہ درج

حیدرآباد: سائبرآباد کمشنریٹ سے تعلق رکھنے والے ایک سب انسپکٹر کے خلاف اپنی 6 سالہ پوتی کو عوامی سڑک پر کار چلانے کی اجازت دینے کے الزام میں مقدمہ درج کر لیا گیا ہے۔

پولیس کے مطابق، سائبرآباد کمشنریٹ میں تعینات سب انسپکٹر پجاری تروپتی نے اپنی پوتی کو نارسنگی پولیس اسٹیشن کے حدود میں واقع گنڈنگوڑہ روڈ پر گاڑی چلانے دی۔ اس دوران سڑک پر سفر کرنے والے دیگر گاڑی سواروں نے صورتحال کو دیکھ کر گاڑی کو روکا۔

عینی شاہدین کے مطابق، جب گاڑی کو روکا گیا تو سب انسپکٹر نے یہ کہہ کر وضاحت کرنے کی کوشش کی کہ گاڑی آٹومیٹک تھی، اسی لیے انہوں نے بچی کو اسے چلانے کی اجازت دی۔

واقعے کی ویڈیو سوشل میڈیا پر وائرل ہونے کے بعد عوامی سطح پر شدید ردعمل سامنے آیا اور کم عمر بچی کو مصروف سڑک پر گاڑی چلانے دینے کے عمل کو غیر ذمہ دارانہ اور خطرناک قرار دیا گیا۔

واقعے کا نوٹس لیتے ہوئے نارسنگی پولیس نے سب انسپکٹر پجاری تروپتی کے خلاف متعلقہ دفعات کے تحت مقدمہ درج کر لیا ہے۔ پولیس حکام کا کہنا ہے کہ معاملے کی مزید تحقیقات جاری ہیں اور قانون کے مطابق کارروائی عمل میں لائی جائے گی۔