سگنل کی خرابی سے سینٹرل ریلوے کی لوکل ٹرین خدمات متاثر

ممبئی  :   ممبئی میں پیر کی صبح سینٹرل ریلوے کی لوکل ٹرین خدمات دو مقامات پر سگنل میں خرابی کے باعث متاثر ہوئیں، جس سے مسافروں کو پریشانی کا سامنا کرنا پڑا۔

ریلوے حکام کے مطابق، سینٹرل ریلوے کنٹرول روم کو پیر کی صبح 10 بج کر 55 منٹ پر سگنل میں خرابی کی اطلاع موصول ہوئی۔

یہ خرابی تھانے اور ملنڈ اسٹیشنوں کے درمیان اور کانجورمارگ اور بھانڈوپ اسٹیشنوں کے درمیان پیش آئی۔ اس کے باعث دونوں سمتوں میں چلنے والی فاسٹ اور سلو لوکل ٹرینوں کی آمدورفت متاثر ہوئی۔

سگنل میں خرابی کے سبب متاثرہ حصوں میں ٹرینیں کم رفتار سے چلائی جا رہی تھیں، جس کی وجہ سے خدمات میں تاخیر ہوئی۔

ریلوے حکام نے بتایا کہ خرابی دور کرنے اور ٹرینوں کی آمدورفت معمول پر لانے کے لیے مرمت کا کام شروع کر دیا گیا ہے