سندھیا تھیٹر واقعہ پر چیف منسٹر کا اسمبلی میں سخت بیان، الو ارجن اور فلم انڈسٹری پرتنقید

حیدرآباد: الو ارجن کے سندھیا تھیٹر کے واقعہ اور ان کی گرفتاری پر کے چیف منسٹر ریونت ریڈی نے اسمبلی میں سخت ردعمل ظاہر کیا ہے۔ انہوں نے کہا کہ "اگر ایک دن ہیرو جیل میں جائے تو پورے فلم انڈسٹری والے تعزیت کے لیے آتے ہیں۔” چیف منسٹر نے اس دوران سندھیا تھیٹر کے واقعہ پر تفصیل سے بات کرتے ہوئے کہا کہ پولیس اس معاملے کی تحقیقات کر رہی ہے۔

چیف منسٹر نے بتایا کہ سندھیا تھیٹر کی انتظامیہ نے 2 دسمبر کو چکڑپلی پولیس اسٹیشن میں درخواست دی تھی اور کہا تھا کہ پشپّا 2 کی ریلیز کے موقع پر ہیرو، ہیروئن اور فلم کی پوری ٹیم آ رہی ہے، اس لئے سکیورٹی کے انتظامات کیے جائیں۔ پولیس نے 3 دسمبر کو اس درخواست کا جواب دیا اور کہا کہ تھیٹر کے ارد گرد حالات کو مدنظر رکھتے ہوئے وہاں سکیورٹی فراہم کرنا مشکل ہے۔

پولیس نے واضح کیا کہ تھا کہ "تھیٹر کے ارد گرد دیگر سینما ہالز اور ریسٹورنٹس ہیں، اس لیے ہم سیلیبرٹیز کی سکیورٹی نہیں دے سکتے۔”

چیف منسٹر نے یہ بھی کہا کہ پولیس نے تھیٹر انتظامیہ کی درخواست کو مسترد کرتے ہوئے اس بات کی وضاحت کی کہ "اس دن اس مقام پر اتنی زیادہ بھیڑ کو کنٹرول کرنا ممکن نہیں تھا۔” انہوں نے بتایا کہ 3 دسمبر کو تھیٹر انتظامیہ نے ایک درخواست دی تھی جسے پولیس نے مسترد کر دیا تھا۔

 اس کے باوجود، الو ارجن رات 9:30 بجے تھیٹر پہنچے اور وہاں ایک روڈ شو کیا، جس کے نتیجے میں ہزاروں لوگ جمع ہو گئے اور حادثہ پیش آیا۔

چیف منسٹر نے کہا کہ اس دوران اس حادثہ میں ایک خاتون کی موت ہو گئی اور ایک بچے کو برین ڈیتھ کا سامنا ہوا۔ انہوں نے کہا کہ یہ حادثہ اس وقت ہوا جب الو ارجن کے مداح ایک ہی وقت میں تھیٹر پہنچنے کی کوشش کر رہے تھے۔ چیف منسٹر نے یہ بھی الزام عائد کیا کہ "الو ارجن اور پروڈیوسر نے 11 دن تک متاثرہ خاندان سے ملاقات نہیں کی اور نہ ہی انہیں تعزیت پیش کی۔”

انہوں نے مزید کہا کہ "اگر ایک دن ہیرو جیل میں جائے تو پورے فلم انڈسٹری والے تعزیت کے لیے آتے ہیں، لیکن یہاں ایک ماں کی موت ہوئی اور ایک بچہ موت و زندگی کی کشمکش میں ہے، تو کیا کسی نے تعزیت کے لیے جاکر دیکھا؟” چیف منسٹر نے ٹالی وڈ کے نامور شخصیات پر بھی سخت تنقید کی اور کہا کہ "یہ بے حسی دکھانے کا وقت نہیں ہے، متاثرہ خاندان کی حمایت کرنا ضروری تھا۔”