ممتا بنرجی کی سیکوریٹی میں چوک

کولکتہ: مغربی بنگال اسمبلی میں بجٹ اجلاس کے دوران خود کو رکن اسمبلی بتاکر ہاؤز میں داخل ہونے کی کوشش کرنے کا معاملہ سامنے آنے کے ایک دن بعد ہی چیف منسٹر ٰ ممتا بنرجی کی سیکوریٹی میں بڑی چوک کا معاملہ سامنے آیا ہے۔

مدنی پور شہر میں چیف منسٹر ممتا بنرجی کے قافلہ میں ایک نامعلوم نوجوان خاتون پولیس کی رکاوٹیں توڑ کر گاڑی کے سامنے پہنچ گئی۔ اس خاتون کو دیکھ کر چیف منسٹر نے گاڑی روک کر تھوڑی دیر بات بھی کی تاہم اس واقعہ کے بعد چیف منسٹر کی سیکوریٹی میں ایک بڑی خامی سامنے آئی ہے۔

چیف منسٹر نے اپنے ضلع کے دورہ کے دوران مدنی پور شہر میں ایک انتظامی میٹنگ کی۔ صبح وہ مدنی پور کے سرکٹ ہاؤز سے نکل کر جلسہ گاہ کے لیے روانہ ہوئیں۔ چیف منسٹر کی روٹ کے دونوں جانب بڑی تعداد میں پولیس اہلکار اور شہری رضاکار تعینات تھے۔

اس بات کو یقینی بنانے کے لیے کہ کوئی چیف منسٹر کے قریب نہ جا سکے‘ سڑک کے دونوں جانب رسیاں بھی باندھ دی گئی تھیں لیکن جب ممتا بنرجی کی گاڑی ایل آئی سی چوک کے قریب پہنچی تو نوجوان خاتون رسی کو ہٹا کر ممتا بنرجی کی گاڑی کے سامنے آگئی۔ ا

یک شہری رضاکار پولیس اس خاتون کو روکنے کی کوشش کی مگر وہ رکاوٹوں کو ہٹاکر قریب پہنچنے میں کامیاب ہوگئی۔پہلے تو چیف منسٹر کی گاڑی نے خاتون کو اوورٹیک کیا لیکن خاتون کو دیکھ کر ممتا بنرجی نے گاڑی کو روکنے کا حکم دیا اور وہ اس کی طرف بڑھیں تاہم اس وقت تک ممتا بنرجی کے سیکوریٹی گارڈس بھی آگئے۔چیف منسٹر نے گاڑی میں بیٹھ کر نوجوان خاتون سے چند سیکنڈ تک بات کی۔

اس کے بعد ان کا قافلہ پنڈال کی طرف روانہ ہوگیا۔ اس واقعہ کے بعد پولیس‘خاتون کو لے گئی تاہم یہ معلوم نہیں ہوسکا کہ وہ چیف منسٹر کی گاڑی کے سامنے کیوں آئی تھی اور چیف منسٹر سے اس نے کیا بات کی۔گزشتہ روز قانون ساز اسمبلی کے بجٹ اجلاس کے دوران ایک شخص ایم ایل اے کا روپ دھار کر اسمبلی میں داخل ہونے کی کوشش کرتے ہوئے پکڑا گیا۔ وہ 2 حفاظتی حلقوں سے گزرا۔

بعد میں معلوم ہوا کہ وہ شخص ذہنی طور پر غیر مستحکم ہے۔رپورٹ کے لکھے جانے تک خاتون کی شناخت نہیں ہو سکی ہے۔ یہ واضح نہیں ہے کہ چیف منسٹر کے ساتھ کیا بات چیت ہوئی۔ پولیس نے خاتون سے پوچھ تاچھ شروع کر دی ہے تاہم اسے چیف منسٹر کے سیکوریٹی گارڈس کو ایک لفافہ دیتے ہوئے دیکھا گیا۔

مقامی ذرائع کے مطابق چیف منسٹر کے قافلہ کے جانے کے بعد خاتون کو علاقہ میں نہیں دیکھا گیا تاہم سوالات اٹھائے جا رہے ہیں کہ سخت سیکوریٹی کے باوجود خاتون‘چیف منسٹر کے قافلہ کے سامنے کیسے آگئی تاہم اس واقعہ نے چیف منسٹر کے سیکوریٹی گارڈس اور سیکوریٹی کے انچارج دیگر پولیس اہلکاروں کو شرمندہ کر دیا۔

اس وقت کی ایک ویڈیو میں دیکھا جا سکتا ہے کہ خاتون سڑک کے کنارے رسی کی آڑ کو چھوتی ہوئی انتظار کر رہی تھی۔چیف منسٹر کی گاڑی ان کے قریب پہنچی تو وہ پولیس اہلکار کی توجہ سے بچتے ہوئے سڑک پر چلی گئی۔ پولیس نے اسے روکنے کی کوشش کی لیکن نہیں روکی۔