حیدرآباد کے بیشتر مقامات میں سردی کی لہر برقرار

حیدرآباد: ریاست اورشہر حیدرآبادکے بیشتر مقامات شدیدسردی کی لپیٹ میں ہیں۔ حیدرآبادکے کئی مقامات پراقل ترین درجہ حرارت میں گراوٹ درج کیاگیا۔

تلنگانہ اسٹیٹ ڈیولپمنٹ پلاننگ سوسائٹی کے مطابق جمعہ کی صبح بہت سردتھی‘شہر کے مضافاتی علاقہ مولاعلی میں اقل ترین درجہ حرارت 8.6 ڈگری سلسیس درج کیاگیا جبکہ راجندرنگر میں 8.7‘ بی ایچ ای ایل میں 9.2‘ ویسٹ ماریڈ پلی میں 10.9اور شیورام پلی میں کم سے کم درجہ حرارت 10.5 ڈگری سلسیس ریکارڈ کیا گیا۔

محکمہ موسمیات حیدرآبادنے پیش قیاسی کی کہ آنے والے دنوں میں سردی کی لہر برقرار رہے گی۔اقل ترین درجہ حرارت 13 سے 16 ڈگری سلسیس کے درمیان رہنے کا امکان ہے۔

صبح کے اوقات میں کہریادھندرہنے کا امکان ہے۔متحدہ ضلع عادل آبادمیں خون منجمدکرنے والی سردی برقرار ہے۔

موسمیاتی رپورٹ جو تلنگانہ اسٹیٹ ڈیولپمنٹ پلاننگ سوسائٹی نے جاری کی ہے‘کے مطابق تریانی منڈل کاموضع گنی دھاری ریاست کا سردمقام رہا جہاں اقل ترین درجہ حرارت 6.8 ڈگری سلسیس ریکارڈ کیاگیا جبکہ بیلامنڈل میں کم سے کم درجہ حرارت 8.5 ڈگری سلسیس درج کیاگیا ہے۔