جھوٹے وعدے کر کے کانگریس حکومت نے کسانوں سمیت تمام طبقات کو دھوکہ دیا: کے ٹی راما راؤ

حیدرآباد: بی آر ایس کے کارگزارصدر وتلنگانہ کے سابق وزیر کے ٹی راما راؤ نے الزام عائد کیا ہے کہ ریاست تلنگانہ میں کانگریس حکومت گزشتہ 18 ماہ سے عوام کو دھوکہ دے رہی ہے۔

وزیر اعلیٰ ریونت ریڈی کی جانب سے "زرعی شعبہ میں کس نے کیا کیا؟” کے عنوان پر کھلی بحث کے چیلنج کو قبول کرتے ہوئے کے ٹی آر نے کہا کہ وہ اس مباحثہ کے لیے پوری طرح تیار ہیں۔

آج کے ٹی آر پارٹی ہیڈکوارٹرس تلنگانہ بھون پہنچنے کے بعد وہاں سے سوماجی گوڑہ پریس کلب روانہ ہوتے ہوئے میڈیا سے بات کی۔ انہوں نے کہا کہ انتخابات کے دوران جھوٹے وعدے کر کے کانگریس حکومت نے کسانوں سمیت تمام طبقات کو دھوکہ دیا ہے۔

انہوں نے ناراضگی کا اظہار کرتے ہوئے کہا کہ اسمبلی میں عوامی مسائل پر نہ تو بحث کی جاتی ہے اور اگر کی بھی جائے تو اپوزیشن کو مائیک تک نہیں دیا جاتا۔

کے ٹی آر نے کہا کہ اگر وزیر اعلیٰ ریونت ریڈی دہلی میں ہیں تو وہ وزراء کے ساتھ بھی بحث کرنے کو تیار ہیں۔ آج نہیں تو کل سہی، وہ کسی بھی دن کھلی بحث کے لیے تیار ہیں۔

اس موقع پر کے ٹی آر کے ہمراہ بی آر ایس کے سابق وزراء دیاکر راؤ، گنگولا کملاکر، پرشانت ریڈی اور سرینواس یادو بھی موجود تھے۔