تلنگانہ میں بڑھتے سائبر جرائم: جعلی کال سنٹرس، مِیول اکاؤنٹس اور نئے ہتھکنڈے بے نقاب

حیدرآباد: سائبر جرائم میں مسلسل نت نئے طریقے سامنے آ رہے ہیں۔ حالیہ دنوں میں مجرموں نے دیگر افراد کے بینک اکاؤنٹس استعمال کرتے ہوئے غیر قانونی لین دین کا نیا طریقہ اپنایا ہے۔ پہلے جو سرگرمیاں زیادہ تر شمالی ریاستوں تک محدود تھیں، اب ان کے اڈے تلنگانہ میں بھی پکڑے جا رہے ہیں۔

سائبر مجرم مختلف علاقوں کو مرکز بنا کر جعلی کال سنٹرس، فرضی سرمایہ کاری اور "ڈیجیٹل گرفتاری” جیسے دھوکہ میں ملوث ہیں۔ صرف جولائی کے مہینے میں ہی پانچ ایسے اڈے بے نقاب کیے گئے۔ فروری میں ہائی ٹیک سٹی کے پترکانگر علاقپ میں ایک نقلی کال سنٹر سے 63 افراد کو گرفتار کیا گیا، جہاں سے دیگر ریاستوں میں دھوکے کے کالس کیے جارہے تھے۔

سائبر مجرم جنوبی ریاستوں کے عوام کو نشانہ بنا رہے ہیں۔ ان کا نیٹ ورک راجستھان، ہریانہ، جھارکھنڈ اور اتر پردیش کے 10 اضلاع پر مرکوز ہے۔ تلنگانہ سائبر سیکیورٹی بیورو اور دیگر ریاستوں کے سائبر کرائم ونگس نے مل کر ان مجرموں کے ڈیٹا بیس، فون نمبرات، ای میلس اور ویب سائٹس کی فہرست تیار کرنی شروع کر دی ہے۔

جرائم کے لیے سب سے زیادہ استعمال ہونے والی تکنیک "مِیول اکاؤنٹس” ہیں۔ اس میں مجرم دیگر افراد کے بینک اکاؤنٹس کے ذریعہ لین دین کرتے ہیں تاکہ اپنی شناخت چھپائی جا سکے۔ اکاؤنٹ ہولڈرس کو اس کے بدلے کچھ رقم دی جاتی ہے۔ حالیہ دنوں میں یہ بھی سامنے آیا ہے کہ کچھ لوگ محض اکاؤنٹ فراہم کرنے تک محدود نہیں بلکہ خود بھی دھوکے بازی میں سرگرم ہیں۔

یہ گروہ امریکہ، تھائی لینڈ، دبئی، چین اور کمبوڈیا میں بیٹھے منظم نیٹ ورکس کے احکامات پر کام کرتے ہیں۔ منچریال ضلع کے جَنّارم میں پکڑے گئے ایک گروہ میں تین افراد تلنگانہ سے تعلق رکھتے تھے، جبکہ کمبوڈیا سے ایک شخص جیک نامی نے ان کے لیے لیپ ٹاپ اور دیگر آلات روانہ کیے تھے۔

جنوری سے جولائی کے دوران تلنگانہ سائبر سیکیورٹی بیورو نے 228 افراد کو گرفتار کیا۔ ان میں 93 افراد کا تعلق تلنگانہ سے تھا۔
حیدرآباد، رچہ کنڈہ اور سائبرآباد کمشنریٹس کی پولیس نے 150 افراد کو پکڑا۔