ویگنر گروپ کو دہشت گرد تنظیم قرار دے کر اثاثے منجمد کرنے کا فیصلہ

لندن: برطانیہ نے روسی نجی ملیشیا ویگنر گروپ کو دہشت گرد تنظیم قرار دے کر اس پر پابندی عائد کرنے کا فیصلہ کیا ہے۔ برطانیہ کی جانب سے عائد کردہ پابندی کے بعد ویگنر گروپ میں شامل ہونے یا کسی بھی طرح اس کی مدد کو ایک جرم تصور کیا جائے گا۔

برطانوی میڈیا کا اس حوالے سے کہنا ہے کہ برطانیہ کی پارلیمنٹ میں ویگنر گروپ پر پابندی سے متعلق ایک ڈرافٹ پیش کیا جائے گا جس کی منظوری کے بعد روسی نجی ملیشیا کو دہشت گرد تنظیم قرار دے کر اس کے اثاثے منجمد کردیئے جائیں گے۔

برطانوی وزیر خارجہ نے کہا کہ ویگنر گروپ مسلسل عدم استحکام کا باعث بن رہا ہے اور یہ کام صرف روسی سیاسی مفادات کے حصول کے لئے کیا جاتا ہے، یہ دہشت گرد ہیں اور برطانیہ کا قانون اس معاملے میں بہت واضح ہے۔

برطانوی وزیر داخلہ کے مطابق ویگنر گروپ نہ صرف دہشت گرد تنظیم بلکہ تباہی پھیلانے والا گروہ ہے، روسی صدر اسے ایک عسکری ہتھیار سمجھتے ہیں، جس کے یوکرین اور افریقہ میں کئے گئے کام عالمی سکیورٹی کیلئے سنگین خطرے کا باعث ہیں۔

واضح رہے کہ برطانیہ کے ٹیررازم ایکٹ 2000 کے تحت وزیر داخلہ کو یہ اختیار حاصل ہے کہ اگر وہ کسی تنظیم یا گروہ کے بارے میں سمجھتے ہیں کہ وہ دہشت گرد سرگرمیوں میں ملوث ہیں تو انہیں دہشت گرد قرار دے سکتے ہیں۔ برطانیہ کا قانون اس معاملے میں بہت واضح ہے۔