کانگریس سب سے بڑی اپوزیشن ہونے کے باوجود قومی سطح پر قابل بھروسہ متبادل پیش کرنے میں ناکام: تارک راما راو

حیدرآباد: تلنگانہ کے سابق وزیر و بی آر ایس کے کارگزار صدر کے ٹی راما راؤ نے کانگریس پارٹی کی کارکردگی پر سخت تنقید کی۔

انہوں نے زور دے کر کہا کہ کانگریس پارٹی آج اپوزیشن میں سب سے بڑی جماعت ہونے کے باوجود قومی سطح پر کوئی قابل بھروسہ متبادل پیش کرنے میں ناکام رہی ہے، اور یہ ناکامی ہی وہ وجہ ہے جس کے سبب بی جے پی آگے بڑھ رہی ہے۔

انہوں نے دعویٰ کیا کہ اگر مجھ سے پوچھا جائے تومیں یہ کہوں گا کہ وزیر اعظم مودی کا سب سے بڑا اثاثہ خود راہول گاندھی ہیں۔

کے ٹی آر نے چینئی میں شیونادارفاونڈیشن سمٹ سے خطاب کرتے ہوئے کانگریس پارٹی پر زور دیا کہ جب تک وہ گہری نیند سے بیدار نہیں ہوتی خود کو جدید نہیں بناتی، منظم نہیں کرتی اور ایک ایسی شکل میں پیش نہیں کرتی جسے عوام سراہ سکیں، تب تک حالات میں کوئی بڑی تبدیلی نہیں آنے والی ہے۔

راہول گاندھی کی حکمت عملی کو ہدف تنقید بناتے ہوئے کے ٹی آر نے کہا کہ ان کے مشیروں نے انہیں یہ مشورہ دیا ہے کہ چونکہ بی جے پی مذہب کے نام پر تقسیم کا کھیل کھیلتی ہے، اس لئے انہیں اس کا مقابلہ کرنے کے لئے ذات پات کو گلے لگانا چاہیے اور یہی وجہ ہے کہ وہ مسلسل ذات پر مبنی مردم شماری کی بات کرتے رہتے ہیں۔