جی ایچ ایم سی حدود میں رائے دہی کے فیصد میں اضافہ کی کوششیں

حیدرآباد: ڈسٹرکٹ الیکشن آفیسر گریٹرحیدرآبادرونالڈ راس نے کہا ہے کہ گریٹرحیدرآبادمیونسپل کارپوریشن(جی ایچ ایم سی)حدود میں رائے دہی کے فیصد میں اضافہ کی کوششیں کی جا رہی ہیں۔

انہوں نے ایک تلگونیوز چینل کو دیئے گئے انٹرویو میں واضح کیا کہ رائے دہندوں کی تصدیق کا عمل مکمل ہو چکا ہے۔ انہوں نے کہا کہ پولنگ مراکز پر رائے دہندوں کو کسی قسم کی پریشانی سے بچانے کے لیے انتظامات کیے جا رہے ہیں۔

انہوں نے کہاکہ حیدرآباد کے 15اسمبلی حلقوں کے 45لاکھ رائے دہندوں کو حق رائے دہی کی سہولت پہنچانے کے لئے اقدامات کئے جارہے ہیں۔رائے دہی کیلئے الاٹ کئے جانے والے اسٹاف کی ٹریننگ، میٹرئیل،ای وی ایمس، الکٹورل رولس کا کام مکمل کرلیاگیا ہے۔

انہوں نے کہا کہ ہر گھر پہنچ کرووٹر انفارمیشن سپلس کی تقسیم کاکام کیاجائے گا۔انہوں نے زوردیتے ہوئے کہاکہ یہ سلپس تقسیم کرنے والا اسٹاف ان کو حاصل کرنے والے کی دستخط بھی حاصل کرے گا۔

اگر گھر میں رائے دہندہ موجود نہیں ہے تو اس گھر کے کسی بھی دیگر شخص کی دستخط ووٹرسلپس کی تقسیم کے موقع پر حاصل کی جائے گی تاکہ یہ تصدیق کی جاسکے کہ گھروں میں ان سپلس کی تقسیم کو یقینی بنایاگیا ہے۔بوتھ لیول آفیسرس یہ کام کریں گے۔اس پر نگرانی کیلئے سکٹر آفیسرس کو رکھاگیا ہے۔

ان سپلس میں رائے دہندہ کے مرکز رائے دہی،بوتھ کا لوکیشن، رائے دہندہ کا سیرئیل نمبردرج ہوں گے۔انہوں نے زوردیتے ہوئے کہاکہ حساس پولنگ مراکز پر خصوصی اقدامات کئے جارہے ہیں جن میں مسلح مرکزی دستوں کی تعیناتی بھی شامل ہے۔ان مراکز میں ویڈیوگرافی بھی کی جائے گی۔ساتھ ہی ویب کیمروں کے ذریعہ ویب کاسٹنگ کی جائے گی۔ان مراکز پر مائیکروآبزرورس کی خدمات بھی حاصل کی جائیں گی۔