جوبلی ہلز اور بہار میں ایگزٹ پولز کا بڑا سیاسی اشارہ، کانگریس کو برتری، بہار میں این ڈی اے کا پلڑا بھاری

حیدرآباد: جوبلی ہلز ضمنی انتخاب کے لیے منگل کو پولنگ مکمل ہوتے ہی ایگزٹ پولز نے سیاسی ماحول کو گرم کر دیا ہے۔ مختلف سروے ایجنسیوں—چانکیہ اسٹریٹیجیز، پیپلز پلس، اسٹیٹ پول اور ناگنّا سروے—نے کانگریس کو 46 سے 48 فیصد ووٹ شیئر کے ساتھ واضح برتری دکھائی ہے، جبکہ بی آر ایس دوسرے اور بی جے پی تیسرے نمبر پر بتائی جا رہی ہے۔ اگر ایگزٹ پولز درست ثابت ہوئے تو کانگریس امیدوار نوین یادو کے لیے جوبلی ہلز نشست جیتنے کے امکانات کافی بڑھ گئے ہیں، تاہم اصل نتیجہ 14 نومبر کو سامنے آئے گا۔

اسی دوران بہار اسمبلی انتخابات کے دوسرے اور آخری مرحلے کی پولنگ بھی ختم ہو چکی ہے، جہاں میٹرائز، جے وی سی، پی مارک، پیپلز انسائٹ، دینک بھاسکر اور پیپلز پلس سمیت چھ بڑے ایگزٹ پولز نے متحدہ این ڈی اے کی شاندار کامیابی کی پیش گوئی کی ہے۔ دلچسپ اندازہ یہ ہے کہ پرشانت کشور کی نئی سیاسی جماعت ’جن سوراج‘ کو کسی بھی سیٹ پر کامیابی ملنے کے امکانات نہ ہونے کے برابر دکھائے گئے ہیں۔

بہار کے اس مرحلے میں 3 کروڑ 70 لاکھ سے زائد ووٹروں نے 1302 امیدواروں کی قسمت کا فیصلہ کیا، جبکہ 67 فیصد سے زائد پولنگ ریکارڈ ہوئی، جو ریاست کی تاریخ میں سب سے زیادہ شرحِ ووٹنگ میں شمار ہوتی ہے۔ پچھلے انتخابات میں جے ڈی(U) کی کارکردگی کمزور رہی تھی، لیکن اس بار چراغ پاسوان کی این ڈی اے میں واپسی اور بی جے پی کی 101 نشستوں پر مضبوط موجودگی اتحاد کے لیے فائدہ مند ثابت ہو سکتی ہے۔

جوبلی ہلز اور بہار، دونوں ہی ریاستوں میں ایگزٹ پولز سیاسی جوش و خروش بڑھا رہے ہیں، مگر یہ یاد رکھنا ضروری ہے کہ ایگزٹ پولز حتمی نتائج نہیں ہوتے۔ اصل تصویر 14 نومبر کو گنتی کے بعد ہی سامنے آئے گی۔