معروف اداکار وکرم گوکھلے چل بسے

پونے: تجربہ کار بالی ووڈ اور مراٹھی اسٹیج، فلم اور ٹی وی اداکار وکرم گوکھلے کا چہارشنبہ اور جمعرات کی درمیانی شب طویل علالت کے بعد یہاں انتقال ہوگیا۔ وہ 77 برس کے تھے۔

گوکھلے، متعدد بیماریوں میں مبتلا تھے اور دینا ناتھ منگیشکر اسپتال میں زیر علاج تھے۔ چہارشنبہ کی دوپہر ان کی حالت بگڑ گئی اور چند گھنٹوں بعد انہوں نے آخری سانس لی۔

مراٹھی تھیٹر اور سنیما کے ممتاز اداکار، چندرکھانت گوکھلے کے بیٹے، وکرم گوکھلے نے کچھ معروف بالی ووڈ فلموں میں اپنی اداکاری کے جوہر دکھائے۔ انہوں نے سنجے لیلا بھنسالی کی رومانوی فلم ہم دل دے چکے صنم (1999) میں ایشوریا رائے کے والد کا رول نبھایا تھا۔ اس کے علاوہ کمل ہاسن کی ہے رام، بھول بھولیا اور پریہ درشن کی دے دنا دن میں بھی انہوں نے اہم رول ادا کئے تھے۔

سال2010  میں مراٹھی فلم آگھات کی ہدایت کاری انجام دی جبکہ مراٹھی فلم انومتی کے لئے بہترین اداکار کے زمرے میں انہیں نیشنل فلم ایوارڈ سے نوازا گیا۔ انہیں تھیٹر میں اداکاری کے لئے 2011 میں سنگیت ناٹک اکیڈیمی ایوارڈ سے بھی سرفراز کیا گیا تھا۔