خاتون ہیڈ کانسٹیبل نے تلگو زبان میں چارج شیٹ داخل کر کے تاریخ رقم کر دی

حیدرآباد: عام لوگوں کے لئے عدلیہ کے نظام کو مزید قابلِ فہم اور آسان بنانے کی سمت ایک منفرد قدم اٹھاتے ہوئے حیدرآباد کے ڈنڈیگل پولیس اسٹیشن کی خاتون ہیڈ کانسٹیبل سوروپا نے روایات کو توڑتے ہوئے پوری چارج شیٹ تلگو زبان میں داخل کی ہے۔

ایک ایسے وقت میں جب سرکاری کارروائیوں میں انگریزی کا غلبہ ہے ان کی اس پہل کی پولیس محکمہ میں بڑے پیمانہ پر ستائش کی جارہی ہے۔

انہوں نے سال 2025 کے دوران دو اہم مقدمات کی تحقیقات مکمل کیں اور اپنی تمام فائنل رپورٹس تلگو میں جمع کرائیں تاکہ شکایت کنندگان اور مقامی افرادکارروائی کو بہتر طور پر سمجھ سکیں۔

ان مقدمات میں ایک باؤرم پیٹ کی ایک دکان سے غیر قانونی شراب کی ضبطی سے متعلق تھا جبکہ دوسرا کیس ایک لاپتہ خاتون اور اس کی کمسن بیٹی کو تلاش کر کے بحفاظت خاندان سے ملانے کا تھا۔

اعلیٰ حکام نے اس اقدام کی تائید کرتے ہوئے کہا کہ علاقائی زبانوں کا استعمال قانون نافذ کرنے والے اداروں پر عوام کے اعتماد کو مضبوط کر سکتا ہے۔ سوروپا کی ان کوششوں کی ستائش کرتے ہوئے حیدرآباد میں منعقدہ ریاستی سطح کے پولیس پروگرام کے دوران انہیں سائبر واریر کے اعزاز سے بھی نوازا گیا۔