مسلم خواتین کے چہرہ سے نقاب ہٹانے پر حیدرآباد لوک سبھا کی بی جے پی امیدوار مادھوی لتا کے خلاف ایف آئی آر

حیدرآباد: مسلم خواتین کے چہرہ سے نقاب ہٹانے پر حیدرآباد لوک سبھا حلقہ کی بی جے پی امیدوار مادھوی لتا کے خلاف معاملہ درج کیاگیا۔

اس واقعہ کا ویڈیو سوشیل میڈیا پر تیزی سے وائرل ہوگیا جس پر کارروائی کرتے ہوئے ڈسٹرکٹ الیکشن آفیسر رونالڈ راس نے مادھوی لتا کے خلاف ایف آئی آردرج کرنے کے احکامات جاری کئے ہیں۔

مادھوی لتا نے پرانے شہر کے ایک پولنگ بوتھ پرپہنچ کر دو مسلم خواتین سے خواہش کی کہ وہ اپنے برقعہ کا نقاب اٹھائیں تاکہ ان کے چہرہ کی شناخت ان کے تصویری شناختی کارڈس سے کی جاسکے۔

سوشیل میڈیا پر اس ویڈیو کے وائرل ہونے کے بعد کئی افراد نے انتخابی ضابطہ اخلاق کی خلاف ورزی پر مادھوی لتا کے خلاف کارروائی کامطالبہ کیا تھا۔