ایمرجنسی بیٹری میں چھپاکرلایاگیا سونا شمس آباد ایرپورٹ پر ضبط

حیدرآباد: شہرحیدرآبادکے شمس آباد ایرپورٹ پر غیر مجاز طورپر سونے کی اسمگلنگ کے واقعات میں اضافہ ہوتاجارہاہے تاہم کسٹم کے حکام کی چوکسی کی وجہ سے زرد دھات کی اسمگلنگ کے واقعات کو ناکام بنایاجارہا ہے۔

کسٹم حکام نے گذشتہ شب ایمرجنسی بیٹری میں چھپاکرلائے گئے سونے کو ضبط کرلیاگیا۔

ایک اطلاع پر کسٹم کے ایرانٹلی جنس یونٹ کے حکام نے کارروائی کرتے ہوئے دبئی سے ایمریٹس کی فلائٹ EK-524کے ذریعہ کل شب تقریبا تین بجے حیدرآباد پہنچے اس مسافر کے سامان کی تلاشی لی ۔

اس کے سامان میں موجود ایمرجنسی لائٹ کو کھولنے پر بیٹری کی شکل میں لائے گئے اس زرد دھات کا پتہ چلا۔

بعد ازاں اس 1,81,60,450روپئے مالیت کے 2915 گرام سونے کو ضبط کرلیاگیااوراس مسافر کوگرفتار کرلیاگیا۔

اس سے پوچھ گچھ کی جارہی ہے تاکہ یہ پتہ چلایاجاسکے کہ کس کی ایما پراس نے سونے کی اسمگلنگ کی کوشش کی تھی۔اس مسافر کا تعلق آندھراپردیش کے ضلع کڑپہ سے ہے۔