مشرق وسطیٰ

دوران رمضان دبئی میں 202بھکاری گرفتار

دبئی پولیس کی جانب سے بھکاریوں کے خلاف سخت ایکشن لیتے ہوئے 202 بھکاریوں کو حراست میں لے لیا گیاہے۔ زیادہ تر بھکاریوں کے پاس وزٹ ویزا تھا۔

دبئی: دبئی پولیس کی جانب سے بھکاریوں کے خلاف سخت ایکشن لیتے ہوئے 202 بھکاریوں کو حراست میں لے لیا گیاہے۔ زیادہ تر بھکاریوں کے پاس وزٹ ویزا تھا۔

متعلقہ خبریں
رمضان میں وادی کشمیر میں مہنگائی کا جن قابوسے باہر
متحدہ عرب امارات میں رمضان میں 4 ہزار اشیا پر 25 سے 75 فیصد رعایت ہوگی
بھٹی وکرامارکہ نے دعوت افطار کے انتظامات کا جائزہ لیا
نماز تراویح کے لیے حفاظ کرام کا انتظام
رمضان میں مسجداقصیٰ کیلئے اسرائیل کی نئی پابندیاں

غیر ملکی ذرائع ابلاغ کے مطابق دبئی پولیس کی جانب سے کی جانے والی یہ کارروائیاں رمضان المبارک میں بھیک مانگنے کے خلاف مہم کا حصہ ہیں جس کے تحت 112 مرد اور 90 خواتین کوحراست میں لے لیا گیا ہے۔

غیرملکی میڈیا کا اس حوالہ سے کہنا ہے کہ رمضان المبارک کے پہلے 2 ہفتوں میں پکڑے گئے ان افراد کو کم از کم 5 ہزار جرمانہ اور 3 ماہ تک قید کی سزا بھگتنا پڑے گی۔حکام کے مطابق اکثر افراد وزٹ ویزا پر آئے ہوئے تھے تاکہ لوگوں کی رحمدلی کا فائدہ اٹھا کر بھیک مانگ سکیں۔

اس سے قبل یو اے ای میں پولیس نے کارروائی کرتے ہوئے مسجد کے باہر خاتون کے بھیس میں بھیک مانگنے والے ایک عرب شہری کو حراست میں لے لیا۔غیر ملکی ذرائع ابلاغ کے مطابق عرب شہری نے اپنی شناخت چھپانے کے لیے عبایا اور نقاب پہن رکھا تھا، ایک شہری کی اطلاع پر دبئی پولیس کے جنرل ڈیپارٹمنٹ آف کریمنل انوسٹیگیشن نے کارروائی کی۔

دبئی پولیس میں کریمنل انوسٹیگیشن ادارہ کے ڈائرکٹر بریگیڈیئر جنرل علی سالم الشامسی کا کہنا تھا کہ دوران تفتیش بھکاری نے یہ جواز پیش کیا کہ خواتین کو مردوں کے مقابلہ میں ہمدردی کی بنیاد پر زیادہ بھیک دی جاتی ہے۔

بریگیڈیئر جنرل علی سالم الشامسی کا مزید کہنا تھا کہ عرب شہری کی جانب سے پہلے تو فرار ہونے کی کوشش کی گئی مگر اسے فوری کارروائی کرتے ہوئے گرفتار کرکے تحقیقات کا آغاز کردیا گیا ہے۔

بریگیڈیئر جنرل علی سالم الشامسی نے بھکاریوں کو رقم نہ دینے اور صرف جائز ذرائع سے عطیات دینے کی اہمیت پر بھی زور دیا۔ انہوں نے کہا کہ ایسے افراد سے محتاط رہیں جو رمضان المبارک میں لوگوں کی ہمدردی کا فائدہ اٹھاتے ہیں۔