حکومت، تمام تانڈوں میں بنیادی سہولتوں کی فراہمی کو یقینی بنائے گی: چیف منسٹر
چیف منسٹر نے کہا کہ حکومت نے تمام تانڈوں سے جنہیں پہلے ہی گرام پنچایت کا موقف دیا گیا ہے یا حالیہ ایام میں یہ موقف دیا گیا ہو، متعلقہ منڈل ہیڈکوارٹر تک بی ٹی روڈز کی تنصیب عمل میں لانے کا فیصلہ کیا ہے۔
حیدرآباد: تلنگانہ کے چیف منسٹر اے ریونت ریڈی نے چہارشنبہ کے روز کہا کہ ان کی حکومت ریاست کے تمام تانڈوں میں بنیادی سہولتوں کی فراہمی کو یقینی بنائے گی جن میں روڈ کنکٹی ویٹی، پینے کے پانی اور برقی سربراہی شامل ہے۔
انہوں نے کہا کہ حکومت نے تمام تانڈوں سے جنہیں پہلے ہی گرام پنچایت کا موقف دیا گیا ہے یا حالیہ ایام میں یہ موقف دیا گیا ہو، متعلقہ منڈل ہیڈکوارٹر تک بی ٹی روڈز کی تنصیب عمل میں لانے کا فیصلہ کیا ہے۔
وہ، اسمبلی میں آج وقفہ سوالات کے دوارن تانڈوں کو گرام پنچایتوں کی حیثیت سے اپ گریڈ کرنے سے مربوط ایک سوال کا جواب دے رہے تھے۔ چیف منسٹر نے حکومت کی جانب سے موصولہ اطلاعات کا حوالہ دیتے ہوئے کہا کہ پیشرو حکومت نے 7لاکھ ہبیٹیشنس(قریہ جات) آبرسانی کی سہولت فراہم نہیں کی تھی۔
انہوں نے کہا کہ ان کی حکومت کا ماننا ہے کہ ان تانڈوں میں بنیادی سہولتوں کی فراہمی کے بغیر ریاست کی ترقی ممکن نہیں ہے۔ حکومت، تانڈؤں اور دیگر افتادہ قریہ جات کی ترقی کیلئے عملی منصوبہ تیار کرنے کیلئے سنجیدہ ہے جنہیں ترقی کے معاملہ میں نظرانداز کردیا گیا ہے۔
انہوں نے کہا کہ منڈلوں سے ضلع مستقروں تک ڈبل روڈز اور ڈسٹرکٹ ہیڈکوارٹرس سے حیدرآباد تک کیلئے4لین سڑکیں تعمیر کی جائیں گی۔
