حج 2024 : حج سویدھا ایپ حجاج کی صحت و سلامتی میں بھی معاو ن

ممبئی: حکومتِ ہند خصوصاٙ وزارتِ اقلیتی امور کی وزیر اسمرتی زبین ایرانی کی قیادت و سرپرستی میں حج 2024 کے انتظامات لگ بھاگ مکمل ہو گئے ہیں۔ وزارت اقلیتی امور اپنی باوقار وزیر کی سرپرستی میں آج بھی ہندوستانی عازمین حج کے لیے بہتر سہولیات کے لیے پوری طرح کوشاں ہے –

ان سہولیات کو یقینی بنانے کے لیے وزرات نے حج سویدھا ایپ تیار کیا ہے جو جملہ ضروریات کے ساتھ آپ کی صحت و تندرستی میں بھی مدد گار و معاون ہوگا۔ حج سویدھا ایپ نے اپنی خدمات 29 اپریل 2024 سے شروع کر دیں ہیں-

 عازمین ایپ ڈاون لوڈ کریں، چلانا سیکھیں اور اس کا بھر پور فائدہ اُٹھائیں- ان خیالات کا اظہار حج کمیٹی آف انڈیا کے سی، ای، او ڈاکٹر لیاقت علی آفاقی۔ آئی، آر، ایس نے حج ہاوس میں عازمین حج کے لیے میڈیکل کیمپ کا افتتاح کرتے ہوئے کیا۔

ڈاکٹر آفاقی نے مزید بتایا حکومتِ ہند کی وزارتِ صحت اور خاندانی بہبود ہندوستانی حجاج کے لیے ہر سال پورے ملک میں ویکسین ( 135-ACYW) اور دیگر لازمی چانچ کا بندوبست کرتی ہے۔ حج کی ادائیگی میں صحت و تندرستی کی اہمیت و افادیت کو نظر انداز نہیں کیا جا سکتا، عازمین اپنی اور دوسروں کی صحت و سلامتی کے لیے حفظان صحت کے اصولوں کو ہر وقت مدنظر رکھیں۔

سی، ای، او- حج کمیٹی آف انڈیا نے مزید بتایا کہ حکومت ہند پورے موسمِ حج کے دوران ہندوستان کے ہر شہر کے ساتھ سعودی عرب کے دونوں مقدس شہروں مکہ مکرمہ اور مدینہ منورہ اور مقاماتِ شائر میں بھی ہندوستانی عازمین حج کے طبی مسائل کی دیکھ بھال کے لئے اعلیٰ سند یافتہ ڈاکٹرس اور پیرا میڈیکل اسٹاف کا معقول تعداد میں بندوبست کرتی ہے۔

ہندوستانی عازمین کے لیے ادویات اور طبی آلات بھی کافی مقدار میں انتظام کرتی ہے مکہ مکرمہ میں 10 ڈسپنسریاں، 40 بستروں پر مشتمل ہسپتال اور عزیزیہ میں 30 بستروں کا ہسپتال اور مدینہ منورہ میں 3 ڈسپنسریاں اور 15 بستروں کی ایک مین ڈسپنسری ہندوستانی حجاج کے لیے قائم کی گئی ہے۔

حجاج کرام ان طبی خدمات کا چوبیس گھنٹے مفت فائدہ اُٹھا سکتے ہیں۔ آج کے کیمپ میں بڑی تعداد میں عازمینِ حج نے ٹیکے لگوائے ۔ اس موقع پر حج کمیٹی آف انڈیا کے ڈپٹی چیف ایگزیکٹو آفیسر نزیم احمد نے بھی شرکت کی ۔ جبکہ نظامت شیخ محمد غوث، سپرینٹڈینٹ حج کمیٹی آف انڈیا نے کی۔