تلنگانہ میں شدید بارش کا امکان، عوام کو احتیاط برتنے کی ہدایت

حیدرآباد: محکمہ موسمیات نے خبردار کیا ہے کہ تلنگانہ کے مختلف اضلاع میں موسلادھار بارش ہونے کا امکان ہے۔ پیش قیاسی کے مطابق کئی مقامات پر ہلکی سے درمیانی اور بعض علاقوں میں شدید بارش ریکارڈ کی جا سکتی ہے۔ رنگا ریڈی، یادادری، سوریاپیٹ، نلگنڈہ، ورنگل، مُلگ، محبوب آباد، کھمم اور بھدرا دری کوتہ گوڑم اضلاع میں بارش کی شدت زیادہ رہنے کا امکان ہے، جس پر عوام کو محتاط رہنے کی ہدایت دی گئی ہے۔

محکمہ موسمیات کے مطابق 22 ستمبر کو نرمل، نظام آباد، رنگا ریڈی، وقارباد، سنگا ریڈی، محبوب نگر، ناگرکرنول، ونپرتی، نارائن پیٹ اور جوگولامبا گدوال اضلاع میں بھی بھاری بارش کے امکانات ہیں۔ اس دوران بعض مقامات پر تیز ہواؤں کے جھونکے چلیں گے جن کی رفتار 30 سے 40 کلومیٹر فی گھنٹہ تک رہ سکتی ہے۔

محکمہ نے مزید بتایا کہ 25 ستمبر تک مشرقی وسطیٰ بنگال کی خلیج اور شمالی خلیج کے قریب ایک کم دباؤ کا علاقہ بننے کے آثار ہیں، جو بعد ازاں مغربی-شمال مغربی سمت میں بڑھتے ہوئے وسطی خلیج بنگال کے قریب پہنچے گا۔ یہ نظام 26 ستمبر تک ایک طوفان میں تبدیل ہو سکتا ہے اور 27 ستمبر تک امکان ہے کہ یہ طوفان ساحلی جنوبی اڑیسہ اور شمالی آندھرا پردیش کے علاقوں سے ٹکرا جائے۔

محکمہ موسمیات نے ریاستی عوام اور کسانوں کو مشورہ دیا ہے کہ وہ اگلے چند دنوں تک موسم پر گہری نظر رکھیں اور احتیاطی اقدامات اختیار کریں۔