حیدرآباد کی نمائش ذائقوں کا سنگم۔ آگرہ کا پیٹھا، کیرالہ کا حلوہ، ایک ہی چھت تلے ملک بھر کے پکوان

حیدرآباد: حیدرآباد کی مشہورِ زمانہ کل ہند صنعتی نمائش صرف خریداری کا مرکز نہیں ہے بلکہ یہ اب ملک بھر کے ذائقوں کا ایک بڑا مرکز بن چکی ہے۔ اس سال یہاں ملک کی مختلف ریاستوں سے آئے ہوئے روایتی پکوان اور مٹھائیاں لوگوں کی توجہ کا خاص مرکز بنی ہوئی ہیں۔

نمائش میں اس بار خصوصی طور پر 20 فوڈ اسٹالس لگائے گئے ہیں جہاں مختلف ریاستوں کے مشہور پکوان لائیو تیار کیے جا رہے ہیں۔ کشمیر سے کنیا کماری تک کے مشہور ذائقوں کو حیدرآبادی عوام کے لئے پیش کیا جا رہا ہے۔
اتر پردیش اور دہلی کی مشہور مٹھائی خجلا یہاں کی خاص کشش ہے۔ یہ میدہ، دودھ اور چینی سے بنتی ہے اور اسے تازہ تیار کر کے 250 سے 300 روپے فی کلو فروخت کیا جا رہا ہے۔ اس کے علاوہ آگرہ کا مشہور کھاجا اور ‘پیٹھا’ بھی دستیاب ہے۔
شملہ کا خاص بڑے سائز کا پاپڑ جس پر سات قسم کے مصالحے چھڑکے جاتے ہیں، لوگوں کو بے حد پسند آ رہا ہے۔ کیرالہ کے شہر کالی کٹ سے آیا ہوا رنگ برنگا حلوہ بچوں اور بڑوں دونوں میں یکساں مقبول ہے۔
خریداری کے شوقین افراد کے ساتھ ساتھ اب یہاں فوڈ لورز کی بھی بڑی تعداد پہنچ رہی ہے۔ نمائش میں حیدرآباد کے مشہور برانڈز جیسے پستہ ہاؤس حلیم کے لئے، کیفے نیلوفر ایرانی چائے اور صابودانہ وڑا اور دیگر مقامی ہوٹلوں کے اسٹالس بھی موجود ہیں۔
خریداری کے بعد خاندان اور دوستوں کے ساتھ ان لذیذ کھانوں سے لطف اندوز ہونا نمائش کے تجربہ کو مزید یادگار بنا دیتا ہے۔ یہاں آنے والے سیاحوں کا کہنا ہے کہ ایک ہی جگہ پر ملک کی مختلف ریاستوں کے پکوان ملنا کسی نعمت سے کم نہیں۔