حیدرآباد: کرانہ شاپ میں غیرقانونی طورپر شراب کی فروخت،ایک شخص گرفتار

حیدرآباد: حیدرآباد کے مضافاتی علاقہ میڈی پلی پولیس اسٹیشن کے حدود میں ایک کرانہ شاپ میں غیر قانونی طور پر شراب فروخت کرنے والے شخص کو گرفتار کیا گیا۔

پولیس کے مطابق، چندرایا نامی 72 سالہ شخص چنگی چرلہ بھگت سنگھ نگر میں کرانہ دکان کی آڑ میں غیر قانونی شراب فروخت کر رہا تھا۔

ہنومان جینتی کے موقع پر حکومت نے شراب کی فروخت پر پابندی عائد کی تھی، مگر چندرایا ان احکامات کی خلاف ورزی کرتے ہوئے زیادہ قیمت پر شراب فروخت کر رہا تھا۔

خفیہ اطلاع پر پولیس نے دکان پر چھاپہ مارا اور پانچ لیٹر غیر قانونی شراب ضبط کرتے ہوئے اسے حراست میں لے لیا۔ ملزم کے خلاف مقدمہ درج کر کے جانچ کی جا رہی ہے۔

میڈی پلی سی آئی گووند ریڈی نے انتباہ دیا ہے کہ غیر قانونی طور پر شراب فروخت کرنے والوں اور بیلٹ شاپس چلانے والوں کے خلاف سخت قانونی کارروائی کی جائے گی۔