ہندستان سے ہری مرچ کی بنگلہ دیش کو درآمد

ڈھاکہ: بنگلہ دیش میں ہری مرچ کی آسمان چھوتی قیمتوں کے درمیان ہندوستان سے اس کی درآمد پیر سے شروع ہوگی۔ ڈھاکہ ٹریبیون کی خبر کے مطابق عیدالاضحی کے موقع پر چھ روزہ بندش کے بعد بنگلہ دیش اور ہندوستان کے درمیان سامان کی درآمد اور برآمد کل سے دیناج پور کی ہلی بندرگاہ سے دوبارہ شروع ہو جائے گی۔

ایک درآمد کنندہ انور حسین نے بتایا کہ ہری مرچ کی سپلائی میں کمی کے باعث مارکیٹ میں اس کی قیمتیں آسمان کو چھو رہی ہیں۔ سپلائی برقرار رکھنے کے لیے حکومت نے ایک بار پھر 25 جون کو ہندستان سے ہزاروں ٹن ہری مرچ کی درآمد کا اجازت نامہ جاری کیا ہے۔

ہلی لینڈ پورٹ سینٹر فار پلانٹ ڈیزیز کنٹرول کے پیتھالوجسٹ شمیم ​​احمد نے کہا کہ سات درآمد کنندگان کو ہلی لینڈ پورٹ سے 3000 ٹن ہری مرچ درآمد کرنے کی اجازت دی گئی ہے۔

اطلاعات کے مطابق ہفتہ کو مقامی بازاروں میں زیادہ تر اسٹالز پر ہری مرچیں نہیں تھیں اور جن کے پاس تھی وہ مہنگے داموں میں فروخت کر رہے تھے۔ دارالحکومت ڈھاکہ اور باریسل سمیت دیگر شہروں میں ہری مرچ 400 سے 600 روپے فی کلو فروخت ہو رہی ہے۔

 صارفین نے اس کی قیمتوں میں اضافے کی وجہ مقامی انتظامیہ کی جانب سے نگرانی کی کمی کو ذمہ دار ٹھہرایا۔ اس کے ساتھ ساتھ تاجروں کا کہنا ہے کہ ہری مرچ کی قیمتوں میں اضافے کی وجہ عیدالاضحی کی تعطیلات کے دوران سپلائی میں کمی اور مسلسل بارشیں ہیں۔