لبنان میں نباتیہ علاقے پر اسرائیلی حملے میں 16 لوگوں کی موت

بیروت: جنوبی لبنان کے نباتیہ شہر میں حکومتی عمارتوں پر اسرائیلی فضائی حملوں میں 16 لوگوں کی موت ہوگئی اور 52 زخمی ہو گئے، یہ اطلاع لبنان کی وزارت صحت نے بدھ کے روز دی ہے۔

وزارت صحت نے ‘ایکس” پر کہا کہ”تازہ ترین اعداد و شمار کے مطابق، نباتیہ کے وسط میں واقع دو انتظامی عمارتوں پر اسرائیلی فضائی حملوں میں 16 لوگوں کی موت ہوگئی اور 52 باشندے زخمی ہوئے۔

اس سے قبل لبنانی میڈیا نے اطلاع دی تھی کہ جنوبی لبنان کے شہر نباتیہ کے سربراہ اور میونسپلٹی کے متعدد ملازمین اسرائیل کی جانب سے کی گئی بمباری میں مارے گئے۔ اطلاعات کے مطابق جنوبی لبنان کے میڈیا روابط کے سربراہ بھی مہلوکین میں شامل ہیں۔

یکم اکتوبر سے اسرائیل جنوبی لبنان میں حزب اللہ فورسز کے خلاف زمینی کارروائی کر رہا ہے جبکہ فضائی حملے جاری رکھے ہوئے ہیں۔ اپنے نقصانات کے باوجود، حزب اللہ زمین پر اسرائیلی فوجیوں سے لڑ رہی ہے اور سرحد پار راکٹ داغ رہی ہے۔