شعبہ صنعت میں تلنگانہ کو ملک بھر میں آگے لے جانے کے اقدامات کئے جائیں گے :وزیر آئی ٹی

حیدرآباد:تلنگانہ کے وزیر آئی ٹی و امورمقننہ سریدھربابو نے کہا ہے کہ صنعتوں کے شعبہ میں تلنگانہ کو ملک بھر میں آگے لے جانے کے اقدامات کئے جائیں گے۔انہوں نے ایک تلگو نیوز چینل سے بات کرتے ہوئے کہا کہ تلنگانہ ریاست میں یقینی طورپرکئی صنعتیں ہیں۔

ان صنعتوں کی ترقی کے ساتھ ساتھ چھوٹے پیمانہ کی صنعتوں کا قیام ترجیح ہوگی۔راہل گاندھی نے باربار کہا ہے کہ ان سے جڑے کئی افراد کو روزگار ملنا چاہئے۔ساتھ ہی نوجوانوں کومزید روزگار فراہم کرنے کے اقدامات کئے جائیں گے۔

انہوں نے کہاکہ وہ وزیر امورمقننہ کے طورپرقانون ساز اسمبلی میں بہتر اورنتیجہ خیزمباحث کو یقینی بنائیں گے۔یہ کہتے ہوئے کہ صنعتوں کو بہتر طورپر کام کرنا چاہئے،اس سے معیشت بہتر ہوسکے گی اورروزگار کے شعبہ میں کئی مواقع فراہم کئے جائیں گے۔

انہوں نے واضح کیا کہ صنعتوں کی تفصیلات، ان کے موجودہ موقف،آنے والے دنوں میں کس طرح ان کو آگے لے جانے کے اقدامات کئے جائیں، اس پرعہدیداروں کے ساتھ جائزہ لیاجائے گا۔ ریاست کو صنعت اور آئی ٹی کے شعبوں میں لیڈر بنایاجائے گا۔