اے آئی سے بنائی گئی نقلی ویڈیوز میں اضافہ، سجنار نے ذمہ دارانہ استعمال پر زور دیا

حیدرآباد: آرٹیفیشل انٹیلیجنس کے عام ہونے کے بعد نہایت مشکل ویڈیوز کو بھی بآسانی تیار کیا جا رہا ہے۔ اگرچہ ابتدائی طور پر اے آئی مفید ثابت ہوئی، مگر رفتہ رفتہ اس کے استعمال میں حد سے زیادہ اضافہ ہو چکا ہے۔

کچھ ٹکنالوجی سے وابستہ افراد سوشل میڈیا پر فالوورس بڑھانے کی غرض سے اے آئی کے ذریعہ فحش اور نازیبا ویڈیوز تیار کر کے انہیں وائرل کر رہے ہیں۔

تلنگانہ آر ٹی سی کے ایم ڈی اور آئی پی ایس آفیسرسجنار نے سوشل میڈیا پلیٹ فارم "ایکس” پر ایک دلچسپ ٹویٹ کیا۔ انہوں نے اپنے ٹویٹ میں لکھا:

"سوشل میڈیا پر فالوورس اور ویوس کے لیے بعض افراد جان بوجھ کر اے آئی کا غلط استعمال کر رہے ہیں۔ سوشل میڈیا پر کثیر تعداد میں دکھائی دینے والی ان نقلی ویڈیوز کو بہت سے لوگ حقیقت سمجھ بیٹھتے ہیں۔

ایسی ویڈیوز سے متعلق ہوشیار رہنے کی ضرورت ہے۔ ٹکنالوجی ایک دو دھاری تلوار کی مانند ہے، اگر اسے ذمہ داری سے استعمال نہ کیا جائے تو یہ خطرناک بن سکتی ہے۔

ڈیجیٹل دور میں اے آئی کو شخصیت سازی اور ترقی کے لیے استعمال کرنا چاہیے، نہ کہ اس کا غلط استعمال کیا جائے۔”