آسمانی بجلی کی زد میں انڈیگو طیارہ، لکھنؤ میں ہنگامی لینڈنگ (ویڈیو)

لکھنو ٔ: پٹنہ سے لکھنؤ جانے والی انڈیگو ایئر لائنز کی ایک پرواز کو شدید خراب موسم اور طیارے پر آسمانی بجلی گرنے کے بعد لکھنؤ ایئرپورٹ پر ہنگامی لینڈنگ کرنا پڑی۔ بجلی گرنے کے نتیجے میں طیارے کے اگلے حصے کو نقصان پہنچا، تاہم طیارے میں سوار تمام 104 مسافر اور عملے کے 6 ارکان محفوظ رہے۔

یہ واقعہ بدھ کے روز انڈیگو کی پرواز 6E 625 کے ساتھ پیش آیا، جو پٹنہ سے لکھنؤ جا رہی تھی۔ طیارہ تقریباً 17 ہزار فٹ کی بلندی پر پرواز کر رہا تھا جب وہ آسمانی بجلی کی زد میں آگیا۔ لینڈنگ کے دوران شدید خراب موسم اور ژالہ باری کے باعث طیارے کے ریڈوم کو بھی نقصان پہنچا۔

طیارے نے اپنے مقررہ وقت سے تقریباً 8 منٹ پہلے لکھنؤ کے چودھری چرن سنگھ انٹرنیشنل ایئرپورٹ پر بحفاظت لینڈنگ کی۔ لینڈنگ کے بعد تمام مسافر اور عملے کے ارکان طیارے سے بحفاظت باہر آگئے۔

واقعے کے بعد طیارے کو گراؤنڈ کردیا گیا ہے اور ضروری تکنیکی جانچ اور مرمت مکمل ہونے تک یہ پرواز نہیں کرے گا۔ ڈائریکٹوریٹ جنرل آف سول ایوی ایشن یعنی ڈی جی سی اے نے بھی واقعے کی تحقیقات شروع کردی ہیں۔ طیارے کو ڈی جی سی اے کی ضروری منظوری ملنے کے بعد ہی دوبارہ پرواز کی اجازت دی جائے گی۔

انڈیگو کے ترجمان کے مطابق 7 اکتوبر کو پٹنہ سے لکھنؤ جانے والی پرواز 6E 625 کو دورانِ پرواز ناموافق موسمی حالات کا سامنا کرنا پڑا۔ لینڈنگ کے مرحلے میں ژالہ باری کے باعث طیارے کے ریڈوم کو نقصان پہنچا۔ ایئرلائن نے بتایا کہ طیارے نے بحفاظت لینڈنگ کی اور تمام مسافر اپنی منزل پر اتر گئے۔

ایئرلائن کے مطابق واقعے کے فوراً بعد متعلقہ حکام کو اطلاع دے دی گئی تھی۔ اب طیارے کا مکمل معائنہ اور ضروری مرمت کی جائے گی، جس کے بعد ہی اسے دوبارہ آپریشن میں شامل کیا جائے گا۔

انڈیگو کے کسی طیارے کو خراب موسم کے دوران نقصان پہنچنے کا یہ حالیہ دنوں میں دوسرا واقعہ ہے۔ گزشتہ ماہ گوہاٹی سے بنگلورو جانے والی انڈیگو کی ایک پرواز کو کیمپے گوڈا انٹرنیشنل ایئرپورٹ پر لینڈنگ کے دوران ٹیل اسٹرائیک کا سامنا کرنا پڑا تھا۔

ایئرلائن کے مطابق اے 321 نیو طیارے نے تیز ہواؤں کے دوران لینڈنگ کرتے ہوئے رن وے سے غیر معمولی طور پر رابطہ کیا تھا۔ واقعے کے بعد طیارے کو بھی گراؤنڈ کردیا گیا تھا اور نقصان کا جائزہ لینے کے ساتھ ضروری تکنیکی جانچ کی گئی تھی۔