مسلمان شخص کی ہوٹل میں بین الاقوامی معیار کی صفائی، سپریم کورٹ میں مقدمہ کے دوران انکشاف

نئی دہلی: سپریم کورٹ کے جج ایس وی این بھٹی نے ہوٹلوں اور اسٹالس میں صفائی ستھرائی کی حمایت کرتے ہوئے کہا کہ وہ کیرالا میں تعیناتی کے دوران ایک مسلمان شخص کی جانب سے چلائی جانے والی ویجیٹرین ریسٹورنٹ کو جایا کرتے تھے کیونکہ یہاں صفائی ستھرائی کے بین الاقوامی معیارات پر عمل کیا جاتا تھا۔

جسٹس بھٹی نے اپنے تجربہ سے اس وقت واقف کرایا جب وہ جسٹس رشی کیش رائے کے ساتھ بی جے پی زیر اقتدار اترپردیش اور اترکھنڈ کی حکومتوں کی جانب سے دی گئی ہدایات کے خلاف درخواستوں کی سماعت کررہے تھے۔

انہوں نے کہا کہ جب میں کیرالا میں تھا تو میرا یہ تجربہ ہے اور میری یہ معلومات ہیں۔ میں شہر کا نام نہیں بتاؤں گا کیونکہ اس عدالت کا برسرخدمت جج ہوں۔ اس شہر میں ایک ہندو شخص ویجیٹرین ہوٹل چلاتا تھا اور ایک ویجیٹرین ہوٹل ایک مسلمان شخص چلاتا تھا۔

اس ریاست کے جج کی حیثیت سے میں ویجیٹرین غذا کے لئے مسلمان کی جانب سے چلائی جانے والی ہوٹل کو جایا کرتا تھا۔

غذا کے معیار اور تحفظ کے بارے میں وہ ہر چیز آویزاں کرتا تھا۔ وہ دبئی سے واپس ہوا تھا اور صفائی ستھرائی کے بین الاقوامی معیارات پر عمل کرتا تھا اسی لئے وہ میرا پسندیدہ ہوٹل تھا۔