اسماعیل ہانیہ کی شہادت کا بدلہ لیاجائے گا:ایرانی صدر

تہران: حماس کے سربراہ اسماعیل ہانیہ تہران میں اسرائیلی میزائل حملے میں شہید ہوگئے، حملے میں اسماعیل ہانیہ کے ساتھ ان کا ایک محافظ بھی شہید ہوا۔

ایرانی سرکاری میڈیا کے مطابق ایرانی صدر مسعود پزشکیان نے حماس کے سربراہ اسماعیل ہانیہ کی اسرائیلی حملے پر شہادت پر ردعمل دیتے ہوئے کہا ہے کہ اسماعیل ہانیہ کی شہادت کا بدلہ لیں گے۔

ایرانی صدر مسعود پزشکیان نے کہا ہے کہ بزدلانہ حملے کاحساب دینا پڑے گا، ایران اپنی علاقائی سالمیت اورعزت کا دفاع کریگا، دہشت گرد حملہ آور اپنے بزدلانہ اقدام پر پچھتاوا کریں گے۔

ایرانی صدر کا کہنا تھا کہ ایران قابل فخر ساتھی اسماعیل ہانیہ کی شہادت پر افسردہ ہے، کل اسماعیل ہنیہ کیساتھ فتح کانشان بلند کیا آج انہیں کندھوں پر اٹھانا پڑ رہا ہے، ایران اور فلسطین کے درمیان رشتہ پہلے سے زیادہ مضبوط ہوگا۔

اس سے قبل حماس کے سربراہ اسماعیل ہانیہ کی شہادت پر فلسطینی صدر محمود عباس کا اہم بیان سامنے آیا ہے۔ فلسطینی صدر محمود عباس نے اسماعیل ہنیہ کے قتل کی مذمت کی ہے، انہوں نے کہا کہ اسماعیل ہنیہ کا قتل بزدلانہ عمل ہے۔

فلسطینی صدر محمود عباس نے کہا کہ اسماعیل ہانیہ کا قتل خطرناک پیشرفت ہے، دوسری جانب فلسطینی تنظیموں نے مغربی کنارے میں ہڑتال اور بڑے پیمانے پر مظاہروں کی کال دیدی۔

اس حوالے سے ایرانی میڈیا کا کہنا ہے کہ اسماعیل ہانیہ کو شمالی تہران میں میزائل حملے میں نشانہ بنایا گیا، حماس رہنما کو رات کے 2 بجے نشانہ بنایا گیا، ہانیہ تہران میں سابق فوجیوں کے خصوصی ہیڈ کوارٹر میں مقیم تھے۔