اسرائیل نے خود اپنے شہریوں کو ہلاک کیا، ہنی بال پروٹوکول کا استعمال کیا: اخبار ہاریتز

تل ابیب: اسرائیل کے سرفہرست اخبارات میں سے ایک ہاریتز نے لکھا ہے کہ اسرائیلی فوج نے اپنے شہریوں کو خود ہدف بنایا ہے۔

ہاریتز کی شائع کردہ خبر کے مطابق 7 اکتوبر کو فلسطین تحریک مزاحمت ‘حماس’ کے حملوں میں اسرائیل نے اپنے شہریوں پر ’’ہنی بال پروٹوکول‘‘ کا استعمال کیا ہے۔

اخبار نے لکھا ہے کہ 7 اکتوبر کو اسرائیل نے اپنے شہریوں کو اغوا ہونے سے بچانے کے لئے انہیں قتل کرنے کو ترجیح دی ہے۔ اسرائیل فضائیہ نے کم از کم 3 فوجی بیسوں اور فوجی چوکیوں پر بمباری کی ہے۔ اسرائیلی قیدیوں کو غزّہ لے جانے والی گاڑیوں کو بھی خود اسرائیلی فوج نے نشانہ بنایا ہے۔

اسرائیل فوجی ذرائع کے حوالے سے شائع کی گئی خبر کے مطابق فوج کو حکم دیا گیا ہے کہ علاقے کو ’’منطقہ موت‘‘ میں تبدیل کر دیا جائے۔ حکمنامے میں کہا گیا ہے کہ کوئی ایک بھی گاڑی غزّہ کی طرف نہیں جا سکے گی۔ 7 اکتوبر کو حماس کی طرف سے اغوا کئے گئے متعدد افراد کو اسرائیل نے خود فائرنگ کر کے ہلاک کیا ہے۔

واضح رہے کہ ہنی بال پروٹوکول اسرائیل کی عسکری اصطلاحات میں سے ایک ہے۔ اس اصطلاح کے معنیٰ اپنے فوجیوں کو یرغمال دینے کے بجائے انہیں خود قتل کرنے کے ہیں۔

اسرائیلی فوج نے 6 فروری کو اسرائیلی فوج کے ایک ٹینک کی یہودی رہائشی بستی کے ایک مکان پر بمباری اور نتیجتاً 12 اسرائیلی قیدیوں کی ہلاکت سے متعلق تحقیقات شروع کروائی تھیں۔